ТҮРКІСТАНДАҒЫ ЖАҢАДАН АШЫЛҒАН ХАЛЫҚАРАЛЫҚ УНИВЕРСИТЕТТЕ ЖАСАНДЫ ИНТЕЛЛЕКТ ТЕХНОЛОГИЯЛАРЫ БОЙЫНША БІЛІМ БЕРІЛЕДІ

Түркістан қаласында ІТ мамандарын даярлайтын «Woosong University Kazakhstan» жоғарғы оқу орны салтанатты түрде ашылды. Оқу ордасының ашылу салтанатына Қазақстан Республикасы Премьер-Министрінің орынбасары Ермек Көшербаев, ҚР Ғылым және жоғары білім министрі Саясат Нұрбек, Түркістан облысының әкімі Нұралхан Көшеров, Корея Республикасының Қазақстандағы Елшісі Чжо Тэ Ик, «Woosong Education Foundation» білім беру қорының құрметті төрағасы және басқарма мүшесі Ким Сон Кёнг арнайы қатысып, көпшілікті халықаралық университеттің ашылуымен құттықтады.

Жаңа оқу ордасы цифрлық дәуірде жастарға әлемдік деңгейде білім алуға, бәсекеге қабілетті жаңа буын мамандарын даярлауға, озық технологияларды игеруге және Қазақстанды цифрлық дәуірдің көшбасшысына айналдыруға қызмет етеді. Бұл – Қазақстан тарихындағы ең ірі халықаралық білім жобаларының бірі. Қазақстанды Орталық Азиядағы білім және инновация орталығына айналдыруға және жаһандық ғылыми-техникалық прогресстің алдыңғы қатарына шығуға жол ашады.

Еске сала кетейік, 2024 жылғы 1 сәуірде Түркістан облысы әкімдігі мен Корея Республикасының «Woosong» білім қоры арасында ынтымақтастық туралы Меморандумға қол қойылған болатын. Жалпы ауданы 16 252 шаршы метрді құрайтын заманауи ғимарат 17 қабаттан тұрады. Университетте екі білім беру бағдарламасы жүзеге асырылуда. Нақтырақ айтқанда, студенттер «Жасанды интеллект» және «Деректер туралы ғылым» мамандықтары бойынша білім алады. Жоғарыда аталған бағдарламалар аясында «Қос диплом» және «Академиялық ұтқырлық» мүмкіндіктері қарастырылған. «Қос диплом» бағдарламасы аясында студенттер 2 жылды «Woosong University Kazakhstan» университетінде және 2 жылды Woosong University (Корея) немесе Woosong University-дің әлемдегі серіктес оқу ордаларының бірінде оқи алады. Бағдарламаны аяқтаған студенттер екі дипломға ие болады. «Алмасу бағдарламасы» аясында шетелде оқу, тәжірибеден өту мүмкіндіктері бар.

Университетте арнайы профессорлық-оқытушылар құрамы жасақталған. Мұнда 13 оқытушы қызмет етпек. Университеттің материалдық-техникалық базасында 600 орындық жатақхана, Woosong University (Корея) базасындағы электрондық кітапхана бар.

Бүгінде Түркістанға Кореядан 100-ге жуық студент арнайы келді. Олар алдағы бір ай бойы осында білім алып, жергілікті жастармен тәжірибе алмасады.

Түркістан облысы әкімінің баспасөз қызметі