ТҮРКІСТАН ОБЛЫСЫНДА МӘДЕНИ-ТУРИСТІК ІС-ШАРАЛАР ЖАНДАНАДЫ

Бүгін Түркістан облысы әкімінің орынбасары Ертай Алтаевтың төрағалығымен жиын өтті. Жиынға жауапты басқарма өкілдері мен тиісті мекеме басшылары қатысып, қыркүйек-қазан айларында өтетін іс-шаралар легі сараланды. Ұйымдастыру жұмыстарына қатысты ұсыныс-пікірлер айтылды.

– Биыл Түркістан қаласына ерекше мәртебе берілді. Осы мәртебеге орай ауқымды жобалар мен мазмұнды іс-шаралар ұйымдастыру қажет. Бұл бағыттағы жұмыстар жүйелі атқарылуы тиіс, – деген облыс әкімінің орынбасары облыстық мәдениет және туризм басқармасының өкілдеріне бұл бағытта нақты тапсырмалар беріп, міндеттер жүктеді.

Айта кетейік, облыс орталығында биыл бірқатар маңызды мәдени және рухани іс-шаралар ұйымдастырылатын болады. Бүгінгі күнге дейін «Voice of Turan – 2025» халықаралық фестивалі, «Түркінің төрі – Түркістан» жас ақындар айтысы сынды бірқатар маңызды шаралар мен жобалар ұйымдастырылды. Алдағы уақытта «Өнерлі өлке» облыстық өнер фестивалі, Республика күніне арналған салтанатты шаралар мен «Түркістан дауысы» мерекелік концерттерді өткізу жоспарланған.

Түркістан облысы әкімінің баспасөз қызметі