Омбудсмен Еуропалық парламент өкілдерімен кездесу өткізді

Страсбургке жұмыс сапары кезінде ҚР Адам құқықтары жөніндегі уәкіл Артур Кастаев Еуропалық Парламенттің Адам құқықтары жөніндегі кіші комитетінің (DROI) вице-төрағасы Лукаш Кохутпен және Чехиядан келген Еуропа парламентінің мүшесі, Орталық Азия және Моңғолиямен байланыс жөніндегі делегацияның (DCAS) өкілі Томаш Здеховскиймен кездесті.

Кездесу барысында тараптар адам құқықтарын қорғауға, заңның үстемдігіне және құқықтардың бұзылуының алдын алу тетіктеріне қатысты көптеген мәселелерді қозғады. Омбудсмен институт жұмысының негізгі бағыттарын, соның ішінде азаматтардың өтініштерін қарауды және заңнамалық бастамаларды әзірлеуге қатысуды ұсынды.

Талқылау барысында Еуропалық парламентшілер құқық қорғау институттары мен мемлекеттік органдар арасындағы ашық диалогтың маңыздылығын атап өтіп, одан әрі ынтымақтастыққа қызығушылық білдірді.