«Заң және Тәртіп» идеологиясын қоғамда ілгерілету жөніндегі тұжырымдаманы іске асыру шеңберінде қылмысқа қарсы іс-қимылдың тиімділігі мен адамның конституциялық құқықтары мен бостандықтарын сақтау арасындағы теңгерімді қамтамасыз етуге ерекше назар аударылады.
Есірткі құралдарының заңсыз айналымына қарсы іс-қимыл мемлекеттің басым міндеттерінің бірі болып табылады. Сонымен қатар халықаралық стандарттар мен Қазақстан Республикасының заңнамасы қоғамдық қауіпсіздікті қорғау адам құқықтарын бұлжытпай сақтай отырып, адамның қадір-қасиетін құрметтеу және қажетті медициналық әрі әлеуметтік көмекке қолжетімділікті қамтамасыз ету арқылы жүзеге асырылуға тиіс екенін негізге алады.
Қазақстан Республикасының заңнамасында есірткі құралдарының заңсыз айналымына байланысты қылмыстар үшін қатаң жауаптылық көзделген. Атап айтқанда, есірткі құралдарын өткізу, оларды заңсыз айналымға тарту, «жасырып кетушілердің» («закладчиктердің») қызметі, сондай-ақ ақпараттық-коммуникациялық желілер арқылы есірткілерді сатып алу және өткізу тәсілдері туралы ақпаратты тарату ауыр және аса ауыр қылмыстарға жатады және ұзақ мерзімге бас бостандығынан айыру түріндегі жазаға, ал жекелеген жағдайларда өмір бойына бас бостандығынан айыруға дейін әкеп соғады.
Есірткі құралдарын өткізу мақсатынсыз заңсыз сатып алу, сақтау, тасымалдау немесе дайындау да Қазақстан Республикасының заңнамасында көзделген жауаптылыққа әкеп соғады.
Адам құқықтарының жалпыға бірдей декларациясының 25-бабына және Экономикалық, әлеуметтік және мәдени құқықтар туралы халықаралық пактінің 12-бабына сәйкес денсаулықты қорғау және медициналық көмекке қол жеткізу құқығы адамның негізгі құқықтарының бірі болып табылады.
Есірткіге тәуелділіктен емделуге мұқтаж адамдарға Қазақстан Республикасының заңнамасына сәйкес медициналық көмек пен оңалту іс-шараларына қолжетімділік қамтамасыз етіледі. Мұндай көмек дәрігерлік құпияны сақтай отырып, адамның қадір-қасиеті мен науқасттың құқықтарын құрметтеу негізінде, қандай да бір кемсітусіз көрсетіледі.
Заңдылық пен құқықтық тәртіп қағидаттарын сақтау қылмыс жасағаны үшін жауаптылықтың бұлтартпастығын қамтамасыз етуді, сонымен қатар әрбір адамның қорғануға, медициналық көмек алуға және оның қадір-қасиетінің құрметтелуіне деген құқығын қамтамасыз етуді білдіреді.