GOV.KZ – Мемлекеттік органдардың цифрлық ресурстарының бірыңғай платформасы
Жетісу облысында қоғамдық орындарды ластау деректерін анықтау жұмыстары жалғасуда. Құқық бұзушылықтар полицияның Жедел басқару орталығындағы бейнебақылау камералары арқылы да тіркеледі.
Мәселен, Шевченко көшесінде Ақсу ауданының 30 жастағы тұрғыны темекі тұқылын жерге тастаған сәтте бейнекамераға түсіп қалды.
Алғашында болмашы әрекет болып көрінгенімен, мұндай қылықтар көшелердің тазалығына және қалалық ортаның жай-күйіне кері әсер етеді. Тексеру нәтижесінде ер адам әкімшілік жауапкершілікке тартылды.
Жетісу облысының полициясы елді мекендердің тазалығы әр тұрғынның жауапкершілігіне байланысты екенін еске салады. Қарапайым тәртіпті сақтау көшеге қоқыс тастамаудан, айналадағыларды құрметтеуден және қоғамдық орындарды таза ұстаудан басталады.
Тазалық — әрқайсымыздан басталады! Қоғамдық тәртіпті сақтап, айналаны ластамаңыз!
Жетісу облысында «Құқықтық тәртіп» республикалық жедел-профилактикалық іс-шарасы жалғасуда. Полиция қызметкерлері жол қауіпсіздігін қамтамасыз етуге, жол қозғалысы қағидаларын өрескел бұзу деректерінің жолын кесуге және жол-көлік оқиғаларының алдын алуға ерекше назар аударуда.
Бір күннің ішінде полицейлер 367 әкімшілік құқық бұзушылықты анықтады. Оның ішінде көлік құралын алкогольдік масаң күйде басқарудың төрт дерегі тіркелді.
Сонымен қатар, полиция қызметкерлері жол қозғалысы қағидаларын бұзған жүргізушілермен профилактикалық түсіндіру жұмыстарын жүргізіп, жол қауіпсіздігін сақтау, көлік құралын масаң күйде басқарудың қауіптілігі және заң талаптарын орындаудың маңыздылығы туралы түсіндіруде.
Мас күйде көлік жүргізу жүргізушінің өз өміріне ғана емес, жолаушылардың, жаяу жүргіншілердің және жол қозғалысының басқа да қатысушыларының қауіпсіздігіне қатер төндіреді.
Полиция жүргізушілерді белгіленген жылдамдықты асырмауға, жол қозғалысы қағидаларын сақтауға және алкогольдік ішімдік ішкеннен кейін көлік тізгініне отырмауға шақырады.
«Құқықтық тәртіп» жедел-профилактикалық іс-шарасы жалғасуда. Жетісу облысының полицейлері барлық жол қозғалысына қатысушыларды мұқият әрі жауапты болуға шақырады.
Есіңізде болсын: жолдағы жауапкершілік — өз өміріңіз бен өзгелердің қауіпсіздігіне деген құрмет!
Жетісу облысы Полиция департаментінің спортшылары Қазақстан Республикасы ішкі істер органдары қызметкерлері арасында Павлодар қаласында өтетін қоян-қолтық ұрыстан жарысқа белсенді дайындық жүргізуде.
Дайындық аясында полицейлер «Арыстан» спорт академиясымен бірлесіп, оқу-жаттығу жиындарын өткізуде. Жаттығулар барысында кәсіби шеберлікті жетілдіруге, дене төзімділігін арттыруға, жауынгерлік әдіс-тәсілдер мен тактикалық дағдыларды пысықтауға басымдық беріледі.
Қоян-қолтық ұрыс тек күш пен жылдамдықты ғана емес, сонымен қатар сабырлылықты, тәртіпті, өзіне деген сенімділікті және жылдам шешім қабылдай білуді талап етеді. Бұл қасиеттер полицейлер үшін спорт алаңында ғана емес, қызметтік міндеттерін орындау кезінде де аса маңызды.
Жүйелі жаттығулар мен тәлімгерлердің кәсіби қолдауы жоғары нәтижелерге қол жеткізуге және алдағы жарыста өңір намысын абыроймен қорғауға бағытталған.
Жетісу облысының спортшылары жарысқа нық сеніммен дайындалып, өңір намысын лайықты қорғауға бел буып отыр.
Полиция қызметкерлері қоғамдық тәртіпті сақтау және азаматтардың қауіпсіздігін қамтамасыз ету мақсатында қоғамдық орындарда құқық бұзушылықтарды анықтау және олардың алдын алу жұмыстарын жалғастыруда.
Жедел басқару орталығының қызметкерлері бейнебақылау камералары арқылы қоғамдық орындарда алкогольдік ішімдіктерді ішу және мас күйде жүру фактілерін анықтайды. Құқық бұзушылықтар тіркелген жағдайда тиісті шаралар қабылдау үшін оқиға орнына полиция жасақтары жіберіледі.
Полиция азаматтарды қоғамдық тәртіпті сақтауға, заң талаптарын орындауға және айналасындағыларға құрметпен қарауға шақырады.
Республика күні ұлттық мерекесі қарсаңында және «Заң мен тәртіп» қағидатын ілгерілету мақсатында Жетісу облысының полиция қызметкерлері «Жас сақшы» сыныптарының оқушылары үшін М. Тынышбаев атындағы тарихи-өлкетану музейіне танымдық экскурсия ұйымдастырды.
Экскурсияның басты мақсаты – жас ұрпақтың ел тарихына деген қызығушылығын арттыру, тарихи мұраға құрметпен қарауға тәрбиелеу, ұлттық құндылықтар мен дәстүрлерді дәріптеу, сондай-ақ Отанға адал қызмет ету ұстанымын қалыптастыру.
Сапар барысында оқушылар еліміздің тарихымен, өңірдің тарихи-мәдени мұрасымен танысып, өткеннің тағылымы мен ұлттық құндылықтардың маңызын тереңірек түсінуге мүмкіндік алды.
Мұндай іс-шаралар өскелең ұрпақтың бойында отансүйгіштік қасиеттерді қалыптастырып, заңға құрметпен қарауға және қоғам алдындағы жауапкершілікті сезінуге ықпал етеді.
Жетісу облысының полиция қызметкерлері «Қауіпсіз аула» жедел-профилактикалық іс-шарасы аясында тұрғындармен аула кездесулерін өткізуді жалғастыруда.
Кездесу барысында полицейлер тұрғындардың өтініштері мен мәселелерін тыңдап, оларды толғандырған сұрақтарға жауап береді. Сонымен қатар құқық бұзушылықтардың алдын алу шаралары түсіндіріледі.
Әсіресе интернет және телефон арқылы жасалатын алаяқтықтың алдын алуға ерекше назар аударылады. Тұрғындарға, оның ішінде қарт адамдарға, алаяқтардың жаңа айла-тәсілдері түсіндіріліп, олардың құрбаны болмау жолдары айтылады.
Полиция қызметкерлері азаматтарға SMS-кодтарды, банк карталарының деректерін және құпиясөздерді бөгде адамдарға бермеуді, күмәнді өтініштер бойынша ақша аудармауды, сондай-ақ өзін банк немесе құқық қорғау органдарының қызметкері ретінде таныстырған белгісіз адамдарға сенбеуді ескертеді.
Жетісу облысында интернет-алаяқтық фактілерінің тіркелуі 20,4%-ға төмендеді. Өңір аумағында интернет-алаяқтықтың 317 фактісі тіркелген. Бүгінде 123 қылмыстық істің өндірісі аяқталып, оның 101-і сотқа жолданды.
Полиция ескертеді: сақтық танытып, күмәнді жағдайлар туралы дер кезінде хабарлау арқылы алаяқтықтың алдын алуға және жеке қаражатты қорғауға болады.
Жетісу облысында қоғамдық тәртіпті сақтау және азаматтардың қауіпсіздігін қамтамасыз ету құқық қорғау органдары жұмысының басым бағыттарының бірі болып қала береді.
Талдықорған қаласында полиция қызметкерлері қалалық прокуратура өкілдерімен бірлесіп, қылмыстардың алдын алуға, әкімшілік құқық бұзушылықтарды анықтауға және заң талаптарының бұзылуына жол бермеуге бағытталған рейдтік іс-шаралар өткізді.
Рейд барысында бес ойын-сауық орны тексерілді. Әрбір мекеменің әкімшілігімен заң талаптарын сақтау және нысан аумағында құқық бұзушылықтарға жол бермеу жөнінде профилактикалық түсіндіру жұмыстары жүргізілді.
Сонымен қатар патрульдеу кезінде қоғамдық орындарда алкогольдік масаң күйде жүрген бес адам анықталды. Әрбір дерек бойынша тиісті шаралар қабылданды.
Алкоголь өнімдерін сату қағидаларының сақталуына да ерекше назар аударылды. Нәтижесінде заң талаптарын бұзған үш дүкен анықталды.
Бұдан бөлек, полицияның арнайы есебінде тұрған 17 азаматтың тұрғылықты мекенжайы бойынша тексеру жүргізілді.
Мұндай рейдтік іс-шаралар алдағы уақытта да жалғасады. Негізгі мақсат – құқық бұзушылықтарды анықтап қана қоймай, олардың алдын алу, тұрғындардың тыныштығын сақтау және қалада қауіпсіз орта қалыптастыру.
Полиция азаматтарды заң талаптарын сақтауға, қоғамдық тәртіпті бұзбауға және айналасындағылардың қауіпсіздігіне құрметпен қарауға шақырады.
Талдықорған қаласындағы Орталық саябақтың қабырғалары мен басқа да нысандарына түрлі жазулар мен суреттер салу фактілері тіркелуде.
Полиция қоғамдық орындар қала тұрғындары мен қонақтарының демалуына арналған ортақ кеңістік екенін еске салады. Оларды таза ұстау және қоғамдық мүлікті сақтау — әр азаматтың міндеті. Қоғамдық мүлікті бүлдіру жай ғана еркелік емес, заңнамада көзделген жауапкершілікке әкеп соғуы мүмкін.
Мұндай құқық бұзушылықтарды кәмелетке толмағандар жасаған жағдайда, заңда белгіленген тәртіппен олардың ата-аналары немесе заңды өкілдері де жауапкершілікке тартылуы мүмкін.
Полиция жасөспірімдерді өз әрекеттерінің салдарын ойлауға, ал ата-аналарды балаларының бос уақытын қалай өткізетініне назар аударуға шақырады.
Туған қаланы құрметтеу әрқайсымыздан басталады. Орталық саябақтың тазалығы мен тәртібін бірге сақтайық!
Заң мен тәртіп — әр адамның жауапкершілігінен басталады!
Учаскелік полиция инспекторының жұмысы – тұрғындармен күнделікті байланыс орнату, құқық бұзушылықтардың алдын алу және қоғамдық тәртіпті қамтамасыз ету. Бұл – үлкен жауапкершілікті, шыдамдылық пен кәсіби шеберлікті талап ететін қызмет.
Капитан полиция Елдар Дидарұлы Дүйсенғазиев ішкі істер органдарында 2016 жылдан бері қызмет етіп келеді. Осы жылдар ішінде ол полиция қызметінің қыр-сырын меңгеріп, қоғам тыныштығын сақтауға өз үлесін қосып келеді.
Учаскелік инспектордың жұмыс күні қызметтік міндеттерді айқындаудан және өзіне бекітілген аумақтағы жедел жағдайды зерделеуден басталады. Күнделікті қызмет барысында ол тұрғындармен кездесіп, азаматтардың өтініштерін қарайды, профилактикалық әңгімелер жүргізеді және құқық бұзушылықтардың алдын алу шараларын жүзеге асырады.
Сонымен қатар тұрмыстық жанжалдардың алдын алу, профилактикалық есепте тұрған азаматтармен жұмыс жүргізу және халыққа заң талаптарын түсіндіру – учаскелік инспектор қызметінің маңызды бағыттарының бірі.
Бұл жұмыста әрбір азаматтың мәселесіне мұқият қарау, тұрғындармен сенімді қарым-қатынас орнату және туындаған жағдайларға дер кезінде ден қою аса маңызды. Өйткені учаскелік инспектор – халықпен тікелей байланыста болып, тұрғындардың өтініштері мен мәселелеріне назар аударатын полиция қызметкері.
Елдар Дүйсенғазиев үшін полиция қызметі – жай ғана мамандық емес, қоғам алдындағы жауапкершілік пен азаматтардың қауіпсіздігін қамтамасыз етуге бағытталған қызмет.
Бала күнгі арманын мамандыққа айналдырған капитан полиция Елдар Дүйсенғазиев бүгінде заң мен тәртіпті сақтауға, халықтың тыныштығы мен қауіпсіздігін қамтамасыз етуге өз үлесін қосып келеді.
Талдықорған қаласындағы №7 орта мектепте «Жарық бол!» акциясы аясында бастауыш сынып оқушыларына профилактикалық сабақ өткізілді.
Іс-шара барысында балаларға жол қозғалысы ережелері түсіндіріліп, жаяу жүргіншілер өткелі арқылы жолды дұрыс кесіп өту тәртібі айтылды. Сондай-ақ қараңғы уақытта киімге жарық шағылыстыратын элементтерді тағудың маңыздылығы түсіндірілді.
Сабақ соңында оқушыларға жарық шағылыстыратын элементтер таратылды. Бұл құралдар қараңғыда және көріну мүмкіндігі төмен жағдайда балалардың жүргізушілерге анық көрінуіне көмектеседі.
Акцияның негізгі мақсаты – балалардың жолдағы қауіпсіз мінез-құлық дағдыларын қалыптастыру және кәмелетке толмағандардың қатысуымен болатын жол-көлік оқиғаларының алдын алу.