ҰЛ-ҚЫЗДАРҒА ДҰРЫС ТӘРБИЕ БЕРГЕНІҢІЗ ҮШІН АЛҒЫС АЙТАМЫЗ

Жетісу облысы ПБ бастығы полиция генерал-майоры Атығай Арыстанов Отан алдындағы қызметтік борышын абыроймен атқарып жүрген жас қызметкерлердің ата-аналарына ұрпақтарына лайықты тәрбие бергені үшін алғысын білдірді. Талдықорған қаласының Мәдениет сарайында Республика күнін мерекелеу қарсаңында 11 полиция қызметкерлерінің  ата-аналарына құрмет көрсетіліп, салтанатты жиында оларға алғыс хаттар табыс етілді. Олардың ішінде патрульдік полиция инспекторы Елдос Серікұлының анасы Шынар Жылқыбаева, Текелі қаласының тергеушісі Бека Инкарбековтың анасы Лаура Сартбаева, Ақсу аудандық полициясының криминалисті Әли Талғатпекті тәрбиелеген Қайрат Оражанов және тағы басқалары бар.

«Ұлдар мен қыздарды лайықты тәрбиелегеніңіз үшін рахмет. Сіз олармен мақтана аласыз, өйткені олар өздерінің кәсіби міндеттерін абыроймен орындауда. Олардың әрқайсысы қызметке кірісіп, елдегі құқықтық тәртіпті сақтауға және нығайтуға елеулі үлес қосуда. Балаларыңыздың қызметтерін абыроймен жалғастырып, мансаптық өсу мен биік белестерден көрінуіне тілектеспін», - деп атап өтті генерал Атығай Арыстанов.

Жетісу облысы ПД Баспасөз қызметі