GOV.KZ – Мемлекеттік органдардың цифрлық ресурстарының бірыңғай платформасы
ШҚО-ның жас сақшылары құқықтық квестте білімдерін сынады
Республика күні қарсаңында Өскемен қаласындағы №30 мектептің «Жас сақшы» полиция сыныбының тәрбиеленушілері «Республика және Конституция: жауапты азамат – қуатты мемлекет» атты құқықтық квестке қатысты.
Квест барысында оқушылар Конституция мен заңнамаға қатысты сұрақтарға жауап беріп, тапқырлықтары мен топпен жұмыс істеу қабілеттерін көрсетті. Олар азаматтардың құқықтары мен міндеттеріне қатысты тапсырмаларды орындап, білімдерін түрлі жағдайларда қолдануды және дұрыс шешім қабылдауды үйренді.
Іс-шара қорытындысы бойынша үздік қатысушылар анықталып, оларға грамоталар табысталды.
Мұндай шаралар жас сақшылардың құқықтық сауаттылығын арттырып, заңға құрметпен қарауға және өз әрекеттеріне жауапкершілікпен қарауға тәрбиелейді.
Заңды білу – өз құқықтары мен міндеттерін түсінуден басталады. Ал оларды сақтау – әр азаматтың жауапкершілігі.
ШҚО ПД баспасөз қызметі
ШҚО-да мектеп оқушыларына діни сауаттылық пен интернеттегі қауіпсіздік туралы айтылды
Заң мен тәртіп қағидаты құқықтық мәдениет пен өз іс-әрекетіне жауапкершілікпен қарауды қалыптастырудан басталады. Осы бағытта ШҚО ПД Экстремизмге қарсы іс-қимыл басқармасы Өскемен қаласындағы Ахмер орта мектебінің 9-сынып оқушыларымен профилактикалық кездесу өткізді.
Кездесуге басқарма бастығының орынбасары, полиция подполковнигі Ринат Құсметов және ШҚО Дін мәселелерін зерттеу орталығының ақпараттық-түсіндіру тобының маманы Ринат Назарбеков қатысты.
Кездесу барысында қазіргі діни ахуал, діни сауаттылықтың маңызы және интернет арқылы жасөспірімдердің деструктивті ағымдардың ықпалына түсу қаупі талқыланды. Сондай-ақ ақпаратты сыни тұрғыдан бағалау, қауіпті үндеулерді ажырата білу және өзгенің теріс ықпалына ермеу мәселелеріне ерекше назар аударылды.
Мұндай кездесулер жастардың ақпараттық кеңістікте дұрыс бағдар табуына, саналы шешім қабылдауына және заң талаптарын сақтаудың маңызын түсінуіне ықпал етеді.
ШҚО ПД баспасөз қызметі
ШҚО-да абаттандыру талаптарының сақталуы бақылауда
«Таза Қазақстан» аясында Тарбағатай ауданының Ақжар ауылында полиция қызметкерлері абаттандыру қағидаларын бұзу фактілерін тіркеді.
Қабанбай, Титов және Жамбыл көшелерінде аумақтарды тиісті деңгейде күтпеу, сондай-ақ түрлі заттар мен қалдықтарды жинап қою деректері анықталды.
ҚР ӘҚБтК-нің 505-бабының 1-бөлігіне сәйкес құқық бұзушыларға ескерту жасалды. Анықталған кемшіліктерді жоюға және аумақтарды ретке келтіруге 10 тәулік берілді.
Тазалықты сақтау — әрбір тұрғынның ортақ жауапкершілігі. Кемшіліктерді уақытылы жою ауыл көшелерінің таза әрі ұқыпты болуына және баршаға қолайлы орта қалыптастыруға ықпал етеді.
Абаттандыру қағидаларын бұзғаны үшін жауапкершілік көзделген.
«Заң мен тәртіп» қағидаты баршаға ортақ.
ШҚО ПД баспасөз қызметі
ШҚО-да абаттандыру талаптарының сақталуы бақылауда
«Таза Қазақстан» аясында Тарбағатай ауданының Ақжар ауылында полиция қызметкерлері абаттандыру қағидаларын бұзу фактілерін тіркеді.
Қабанбай, Титов және Жамбыл көшелерінде аумақтарды тиісті деңгейде күтпеу, сондай-ақ түрлі заттар мен қалдықтарды жинап қою деректері анықталды.
ҚР ӘҚБтК-нің 505-бабының 1-бөлігіне сәйкес құқық бұзушыларға ескерту жасалды. Анықталған кемшіліктерді жоюға және аумақтарды ретке келтіруге 10 тәулік берілді.
Тазалықты сақтау — әрбір тұрғынның ортақ жауапкершілігі. Кемшіліктерді уақытылы жою ауыл көшелерінің таза әрі ұқыпты болуына және баршаға қолайлы орта қалыптастыруға ықпал етеді.
Абаттандыру қағидаларын бұзғаны үшін жауапкершілік көзделген.
«Заң мен тәртіп» қағидаты баршаға ортақ.
ШҚО ПД баспасөз қызметі
Полиция балалардың көзімен: қиял, шығармашылық және қауіпсіздік
Балалар полицейлерді қалай көреді? Заңның қатаң сақшылары, көмекке келетін жандар немесе өз суреттері мен бейнероликтерінің кейіпкерлері ретінде ме? Оқушылар өз көзқарастарын Қасым Қайсенов атындағы мектеп базасында Ұлан аудандық полиция бөлімі ұйымдастырған «Балалар көзімен полиция» байқауында көрсетті.
Байқау «Заң мен тәртіп — қауіпсіз балалық шақтың кепілі» ұранымен өтіп, балаларды қауіпсіздік пен заңды құрметтеу тақырыбына біріктірді.
Жас қатысушылар тапсырмаға шығармашылықпен қарап, суреттер салды, қолөнер бұйымдарын жасады, полиция нысандарының макеттерін құрастырып, бейнероликтер түсірді. Заманауи технологиялар да назардан тыс қалмады: кейбір жұмыстар жасанды интеллект көмегімен әзірленді.
Байқау қорытындысы бойынша жеңімпаздар анықталды:
- «Жасанды интеллект көмегімен жасалған үздік бейнеролик» номинациясы бойынша 2-сынып оқушысы Жандос Нұржанұлы жеңімпаз атанды.
- «Үздік бейнеролик» номинациясында 9-сынып оқушысы Адилия Байтикова жеңіске жетті.
- Полиция учаскесінің макеті үшін бас жүлде 4-сынып оқушысы Дарын Маратқа бұйырды.
- Қолөнер бұйымдары байқауында 0-сынып оқушысы Алихан Қырматолла бірінші орын алды.
Жұмыстар әртүрлі болғанымен, олардың барлығын қауіпсіздік, көмек пен әділдік тақырыптары біріктірді. Балалар өз суреттері, қолөнер бұйымдары мен бейнероликтері арқылы полиция қызметінің өздері үшін қандай мәнге ие екенін және қоғамдық тәртіпті күзететін полицейлерді қалай елестететінін көрсетті.
Жеңімпаздарды құттықтап, барлық қатысушыларға қиялы мен ізденісі, шығармашылық еңбегі үшін алғыс білдіреміз!
ШҚО ПД баспасөз қызметі
Республика күні қарсаңында ШҚО-ның 22 полицейі ант қабылдады
Шығыс Қазақстан облысы Полиция департаментінің алаңында 22 жас қызметкер салтанатты түрде ант қабылдады. Олардың артында бастапқы кәсіби даярлық курстары қалса, алда әрбір шешімі мен іс-әрекеті үшін жауапкершілікті талап ететін қызмет жолы күтіп тұр.
Салтанатты рәсімге жас полицейлердің ата-аналары мен жақындары қатысып, олардың өміріндегі маңызды сәттің куәсі болды. Жас қызметкерлер үшін бұл – оқу кезеңінің аяқталуы ғана емес, азаматтардың құқықтарын қорғауға, заңдылықты сақтауға және қоғамдық қауіпсіздікті қамтамасыз етуге бағытталған кәсіби жолдың басталуы.
Жеке құрамға арнаған сөзінде Полиция департаменті бастығының орынбасары Руфат Қажымқанов анттың мәні тек айтылған сөздермен шектелмейтінін, оның шынайы мағынасы қызметтік міндеттерді қалай атқарудан көрінетінін атап өтті.
«Сіздердің қызметтеріңіз «Заң мен тәртіп» қағидатына негізделуі қажет. Қоғам сіздерді ең алдымен адал, ұстанымшыл және әрдайым көмекке келуге дайын қорғаушылар ретінде көруі тиіс», – деді полиция полковнигі.
Сондай-ақ жас қызметкерлерге ШҚО ІІО және ҰҰ ардагерлер кеңесінің төрағасы Нұрлыбек Үдербаев пен Полиция департаменті Тәлімгерлер кеңесінің төрағасы Дәурен Мұқанов ақ тілектерін арнады. Олар жас полицейлерге қызметте табандылық танытып, кәсіби жетістіктерге жетуді, борышына адал болуды және азаматтардың сеніміне ие болуды тіледі.
Салтанатты рәсімге ата-аналардың ақжарма тілектері де ерекше әсер берді. Балаларын құттықтаған олар таңдаған жолынан таймай, өз ұстанымдарына адал болып, қызметтерін абыроймен атқаруларын тіледі.
Қазақстан Республикасының Республика күні қарсаңында өткен рәсім Отанға қызмет ету саналы таңдаудан басталатынын тағы бір мәрте көрсетті. Енді жас полицейлер қабылдаған анттарына адалдықтарын іс жүзінде дәлелдеуі тиіс. Ол үшін әрбір шешіміне жауапкершілікпен қарап, кәсіби шеберлік танытып, көмекке мұқтаж жандарға қол ұшын беруге дайын болуы абзал.
ШҚО ПД баспасөз қызметі
Тәуелсіздік тарихы және патриоттық құндылықтар: ШҚО жас полицейлеріне арналған кездесу
Қазақстан Республикасы күні қарсаңында Өскемен қаласындағы А. С. Пушкин атындағы кітапханада Шығыс Қазақстан облысы Полиция департаментінің алғашқы кәсіптік даярлық курстарынан өткен жас қызметкерлеріне арналған танымдық кездесу өтті.
Кездесудің басты мақсаты — жас полицейлерді тәуелсіз Қазақстанның қалыптасу тарихымен таныстыру, патриоттық құндылықтарды нығайту және елдің тарихи мұрасына деген құрметті арттыру.
Кездесу барысында қатысушыларға Мемлекеттік егемендік туралы декларацияның тарихи маңызы, еліміздің мемлекеттілігінің қалыптасу кезеңдері және тәуелсіздік жылдарындағы жетістіктері туралы ақпарат берілді.
Отан тарихымен танысу ұлттық құндылықтардың маңызын терең түсінуге және қоғам алдындағы жауапкершілікті сезінуге ықпал етеді. Жас қызметкерлер үшін бұл заңдылық пен тәртіпті қамтамасыз етудегі, азаматтардың құқықтары мен қауіпсіздігін қорғаудағы өз рөлін тереңірек түсінуге де мүмкіндік береді.
Отанға қызмет ету — оның тарихын құрметтеуден және болашағына жауапкершілікпен қараудан басталады.
ШҚО ПД баспасөз қызметі
«Қауіпсіз үй» ЖПІШ аясында 4 мыңға жуық проблемалық мекенжай анықталды
Шығыс Қазақстан облысында «Қауіпсіз үй» республикалық жедел профилактикалық іс-шарасы жалғасуда. Оның негізгі мақсаты — қоғамдық қауіпсіздік деңгейін арттыру, құқық бұзушылықтардың алдын алу және тұрғындардың қауіпсіздігіне қатер төндіруі мүмкін мәселелерді уақытылы анықтау.
Іс-шара аясында полиция қызметкерлері ТЖД мамандарымен бірлесіп, тұрғын үй секторын тексеруде. Бұл ретте қоғамдық тәртіптің жай-күйіне және төтенше жағдайларға себеп болуы мүмкін тұрмыстық жағдайларға баса назар аударылады.
Тұрғындармен кері байланыс орнатуға да ерекше мән беріледі. Есепті кезеңде тұрғындармен 257 кездесу өткізіліп, оған 7 мыңнан астам адам қатысты. QR-кодтар мен жергілікті қауымдастықтардың чаттары арқылы 125 ұсыныс келіп түскен. Қазіргі уақытта олар бойынша тиісті шаралар қабылдануда.
Тұрғын үй секторындағы қауіп-қатер факторларын анықтауға да басымдық берілген. Олардың қатарында өртке әкелуі мүмкін ақаулы пешпен жылыту жүйелері мен өзге де бұзушылықтар, сондай-ақ полицияның профилактикалық бақылауын қажет ететін жағдайлар бар. Жалпы, 4 мыңға жуық проблемалық мекенжай анықталып, оның 1,8 мыңға жуығында кешенді профилактикалық жұмыстар жүргізілді.
Сонымен қатар азаматтық қарудың 1,4 мыңнан астам иесі тексерілді. 20 жағдайда қаруды сақтау қағидалары мен оны тіркеу мерзімдеріне қатысты бұзушылықтар анықталды.
«Қауіпсіз үй» жедел профилактикалық іс-шарасы жалғасуда. Полиция облыс тұрғындарын қауіпсіздік мәселелеріне бейжай қарамауға, ықтимал қауіп-қатерлер туралы хабарлауға және құқық бұзушылықтардың алдын алуға үлес қосуға шақырады.
ШҚО ПД баспасөз қызметі
Шемонаиха тұрғынына ауладағы құрылыс қалдықтары үшін айыппұл салынды
«Таза Қазақстан» аясында Шығыс Қазақстан облысының полиция қызметкерлері елді мекендердегі абаттандыру қағидаларының бұзылуын болдырмау және тазалықты сақтау бағытындағы жұмыстарды жалғастыруда.
Өткен демалыс күндері Шемонаиха аудандық полиция бөлімінің қызметкерлері көпқабатты тұрғын үйдің аумағына құрылыс қалдықтарының үйілгенін анықтады. Мұндай әрекет ауланың көркін бұзып қана қоймай, тұрғындарға да қолайсыздық туғызады.
Абаттандыру қағидаларын бұзғаны үшін кінәлі азамат Қазақстан Республикасының Әкімшілік құқық бұзушылық туралы кодексінің 505-бабы бойынша әкімшілік жауапкершілікке тартылды.
Қабылданған шаралардан кейін құрылыс қалдықтары шығарылып, аумақ тиісті санитариялық жағдайға келтірілді.
Полиция тұрғындарды абаттандыру қағидаларын сақтауға, аулаларды қоқыспен ластамауға және тазалық пен тәртіп әрбір азаматтың жауапкершілігіне байланысты екенін ұмытпауға шақырады.
«Заң мен тәртіп» қағидаты баршаға ортақ.
ШҚО ПД баспасөз қызметі
Қауіпсіздік қызметіндегі цифрлық технологиялар: ШҚО-да қандай жаңашылдықтар енгізілуде
Бейнебақылау камералары, бейнеаналитика және ұшқышсыз ұшу аппараттары — бұл құралдар Шығыс Қазақстан облысының полициясына қоғамдық тәртіпті бақылауға, құқық бұзушылықтардың мән-жайын анықтауға және жедел іс-шараларды жүргізуге көмектеседі.
Цифрлық шешімдердің мүмкіндіктері туралы Өңірлік коммуникациялар қызметінде өткен брифингте ШҚО Полиция департаменті бастығының орынбасары, полиция полковнигі Эльдар Қарсақпаев айтып берді.
Цифрландыру бағыттарының бірі — облыс аудандарында да Жедел басқару орталықтарын дамыту. Олар «102» арнасына келіп түсетін хабарламаларды қабылдау мен тіркеуді автоматтандыруға, сондай-ақ полиция бөлімшелерінің жұмысын үйлестіруге мүмкіндік береді.
Жағдайды бақылау үшін әр аудан орталығында 77 бейнебақылау камерасынан орнатылған. Камералардан түсетін бейне облыс орталығы мен Ішкі істер министрлігінде де қолжетімді. Бет-әлпетті тану функциясын қоса алғанда, бейнеаналитика жүйесі келіп түскен ақпаратты өңдеуге және құқық бұзушылықтардың мән-жайын оқиға ізін суытпай анықтауға көмектеседі.
Полиция жұмысында ұшқышсыз ұшу аппараттары да қолданылады. Олар әуеден патрульдеу, адамдарды іздестіру және жедел іздестіру іс-шараларын жүргізу кезінде пайдаланылады.
Цифрлық шешімдер полицияның мүмкіндіктерін кеңейтіп, ақпаратты уақытылы алуға, жағдайды бағалауға және оқиғаларға жедел әрекет етуге мүмкіндік береді.
ШҚО ПД баспасөз қызметі