Жоғалған екі жасөспірімді Өскемен полицейлері тапты

                                                                Жоғалған екі жасөспірімді Өскемен полицейлері тапты

2022 жылғы 25 желтоқсанда сағат 22:05-те "102" жедел арнасына 34 жастағы жергілікті тұрғыннан қоңырау келіп түсті, ол 2007 және 2009 жылы туған балаларын іздеуге көмек сұрады.

Ер адамның айтуынша, оның 15 жасар ұлы мен 13 жасар қызы 25 желтоқсан күні кешке үйден кетіп, оралмаған. Балалар ұялы телефондарын үйде қалдырып кеткен.

Кәмелетке толмағандардың жүрген жерін анықтау мақсатында дабыл бойынша жедел-іздестіру тобы дереу жиналды.

Тәртіп сақшылары кез-келген ақпаратқа ие бола алатын таныстары мен куәгерлерден сұхбат алып, іргелес аумақтарды: аулаларды, тұрғын үйлердің кіреберістерін, гүлзарларды, саябақтарды, жастар жиналатын орындарды мұқият зерттеді.

Іздеу жаяу және қызметтік автокөліктерді пайдалану арқылы жүзеге асырылды.

"Қабылданған шаралардың нәтижесінде 40 минуттан кейін кәмелетке толмағандарды Боран-2 патрульдік экипажының қызметкерлері полиция аға лейтенанттары Салауат Шәкіров пен Қуаныш Акимеев Островский көшесінен тапты. Кәмелетке толмағандар әкесімен ренжіскеннен кейін үйден кеткендерін айтты. Қазіргі уақытта олардың өмірі мен денсаулығына ешқандай қауіп төніп тұрған жоқ. Үйге аман-есен жеткізілді",-деді Өскемен қ.ПБ бастығы Андрей Мула.

Табылған жасөспірімдердің әкесі құқық қорғау органдарына және оның кәмелетке толмаған балаларын іздеуге көрсеткен көмегі үшін барлық азаматтарға үлкен алғысын білдірді.

                                                                                                                                ШҚО ПД Баспасөз қызметі