Өскеменде полицейлер 4 жасар баланың арманын орындады

                                   Өскеменде полицейлер 4 жасар баланың арманын орындады

 

Патрульдік полиция кішкентай Аланның тілегін орындады. Алан жасына қарамастан өзінің болашақ мамандығын таңдап қойған. Ол патрульдік полиция инспекторы болуды армандайды. Сәбидің анасы өтіп бара жатқан полицейлерге ерекше өтініш жасаған.

      - Алан полицияның көліктерін өте қатты жақсы көреді. Егер оны полиция қызметкерлері туған күнімен құттықтаса ол қатта қуанады,- деді Аланның анасы. Тәртіп сақшылары мұндай ұсынысты күтпеген болса да, бірден қуана келісті.

Аланды туған күнімен құттықтау үшін тәртіп сақшылары патрульдік полицияның қызметтік көлігінің жарқылдағышын қосып, сәби тұратын Потанин көшесіндегі үйдің ауласына келген.  Полиция қызметкерлері ШҚО ПД ППБ  аға қызмет инспекторы аға лейтенант Шахмұрат Ержанов және ШҚО ПД ППБ қызмет инспекторы лейтенант Мират Жашенов Аланды туған күнімен құттықтап, ойыншық полиция көлігін сыйға тартты. Сәбидің қуанышында шек болмады.

Жұмыс уақытының тығыздығына қарамастан, өтінішін орындап, баланың көңілін аулап, уақыт бөлгені үшін Аланның анасы полиция қызметкерлеріне алғысын білдіріп, Полиция департаментінің аккаунтына алғысын жазды.

          - Борт нөмірі 124 патрульдік көліктің қызметкерлеріне үлкен алғысымды білдіремін. Ұлымның саналы туған күнінде керемет, жағымды көңіл-күй сыйлағандарыңыз үшін Сіздерге рахмет айтамын. Тағы да шын жүректен алғыс айтамын. Алан және Мадина,-деді анасы.

Кішкентай Алан үшін бұл күн ұмытылмас болғаны сөзсіз.

 

                                                                                           ШҚО ПД баспасөз қызметі