Глубокое ауданында полицейлер қиын жағдайда қалған әйелді құтқарды

                                                                                          Глубокое ауданында полицейлер қиын жағдайда қалған әйелді құтқарды

18 қараша күні Глубокое ауданының полиция бөліміне Кожоховое ауылының 75 жастағы тұрғыны хабарласып, көршісінің ұзақ уақыт бойы есік ашпай, қоңырауларға жауап бермей жатқанын, мүмкін оның жағдайы нашарлап кеткенін айтқан.

Оқиға орнына учаскелік инспекторлар кезек күттірмей жетті. Жағдайды тексеру барысында және азаматшаның өмірі мен денсаулығына төнген қауіпті ескере отырып, учаскелік полиция инспекторы Шерхан Кеңесбек құтқарушылар келгенге дейін үйге терезе арқылы кіруге шешім қабылдаған.

Пәтерде ол еденде ес-түссіз жатқан 56 жастағы әйел адамды тапқан. Полицей дәрігерлер келгенше алғашқы көмек көрсету арқылы оған есін жиюға көмектескен. Әйел өз бетімен жүре алмағандықтан, учаскелік инспектор, полиция майоры Азамат Түгелов пен полиция лейтенанты Шерхан Кеңесбек жедел жәрдем бригадасын шақырып, оны дәрігерлерге тапсырған.

Полицейлердің жылдам әрекет етуі мен кәсіби біліктілігінің арқасында тұрғынға уақытында көмек көрсетіліп, өмірін сақтап қалды.


                                                                                                                                                                                                               ШҚО ПД баспасөз қызметі