СҚО-да қашып жүрген сотталған тұрғын жылқы ұрлады деген күдікпен полицейлердің қолына түсті

Солтүстік Қазақстан облысындағы М. Жұмабаев ауданы полиция бөлімінің кезекші бөліміне мал ұрланғаны туралы арыз келіп түсті. Белгісіз адам ауыл тұрғынының жылқысын ұрлап әкеткен. Қорадағы жануармен бірге ер-тоқым, жүген мен киіп жүрген пимасын да алып кеткен.

Жедел-іздестіру іс-шаралары барысында жедел уәкілдер мен жылқының иесі қар үстіндегі ізге түсіп, 30 шақырымдай жүреді. Іздер «Булаево – Молодогвардейское» автожолына жақын жердегі орман ішіне алып келеді.

Полиция қызметкерлері қалың бұталардың арасында қазылған жерге үстін жауып тұрғызылған, ішіне қолдан жасалған пеш орнатылған жеркепені байқайды. Ауданның 48 жастағы тұрғыны жылқы етін мүшелеп жатқан жерінде ұсталды. Алдын ала болжам бойынша полицейлер күдіктінің осы қылмысты жасағанын білген.

«Бұл азамат бұрын пәтер ұрлығы үшін сотталып, үш жыл алты айға бас бостандығы шектелген, бірақ пробациялық бақылауға тұрмай, қашып кетіп бой тасалаған. Дәл осы адам ұрланған жылқының иесінде бұрын жұмыс істеген, қора-қопсының орналасқан жерін және қандай жылқылардың үйретілгенін жақсы білген. Жоғалған пима қылмыскердің адамдардан жасырынып жүргенін байқатты», - дейді аудандық полиция бөлімінің бастығы полиция полковнигі Асан Мейрамов.

Қазіргі уақытта ер адам қамауға алынды. Ол мал және пәтер ұрлығын жасады деген күдікпен ұсталды. Анықталғандай, пәтер ұрлығын сот үкімі шыққаннан кейін жасырынған күні жасаған. Сондай-ақ ол пробациялық бақылау ережелерін бұзғаны үшін жауапкершілікке тартылады.

Жыл басынан бері СҚО-да мал ұрлығының 5 фактісі тіркелді, оның 3-і ашылды. Полиция қызметкерлері мал ұрлығының алдын алуға бағытталған жұмыстарды үнемі жүргізеді. Қараша айында өткен «Мал ұрысы» жедел-профилактикалық іс-шарасы барысында бұрын жасалған бір қылмыс ашылып, етті тасымалдау және өткізу кезіндегі ветеринариялық бақылаудың 37 бұзушылығы анықталды.