СҚО-да автобустардың экологияға зияндылығы тексеріліп жатыр

23-28 шілде аралығында Солтүстік Қазақстан облысында «Автобус» республикалық жедел-профилактикалық іс-шарасы өткізіліп жатыр. Автобус жүргізушілері арасында жол апаттарының алдын алу жұмыстарынан бөлек, полицейлер такси, мотоцикл, мопед және екі дөңгелекті көліктің басқа да түрлерінің жүргізушілері тарапынан болуы мүмкін жол жүрісі қағидалары бұзушылықтарының алдын алуға баса назар аударуда.

Жолаушылар көлігінің қатысуымен өңір жолдарында 6 айда 4 жол-көлік оқиғасы тіркелді, онда 5 адам жарақат алды. «Автобус» жедел-профилактикалық іс-шарасының мақсаты – жол апаттарының алдын алу, сондай-ақ жолаушылардың қауіпсіздігі мен жайлылығын қамтамасыз ету.

«Өткізіліп жатқан іс-шараның бірінші күнінің қорытындысы бойынша қоғамдық көлік жүргізушілерінің тарапынан жол жүрісі қағидаларының 65 бұзушылығы анықталды; көлік құралын басқару кезінде ұялы телефонды пайдаланғаны үшін – 13; маневр жасау ережелерін бұзғаны үшін — 8, техникалық тексеруден өтпеген көлікті басқарғаны үшін — 7 жүргізуші әкімшілік жауапкершілікке тартылды; жолаушылар мен багажды заңсыз тасымалдаумен айналысудың бір фактісі анықталды», - деді СҚО ПД жергілікті полиция қызметі басқармасы бастығының міндетін атқарушы полиция подполковнигі Александр Розбах.

Облыс орталығында патрульдік полициямен бірге рейдтік іс-шараларға экология департаментінің қызметкерлері де қатысуда; газ анализаторының көмегімен олар автобустардан шығатын ластаушы заттардың деңгейін өлшейді. Қажетті нормадан асқан жағдайда — құқық бұзушыларға қатысты әкімшілік материал жиналады.

Алты ай ішінде облыста 176 жол-көлік оқиғасы тіркелді, 16 адам қаза тауып, 244 адам жарақаттар алды. Жол қауіпсіздігін қамтамасыз ету облыстық полиция ведомствосының жұмысындағы басым бағыттардың бірі болып табылады.