Масаң күйінде көлік басқарғаны үшін алты айға бас бостандығынан айырылады

Масаң күйінде көлік басқарғаны үшін Ғабит Мүсірепов атындағы ауданның тұрғыны ұсталып, алты айға бас ботандығынан айыру жазасын алды. 35 жасар ауылдық 4-ші сәуір күні алкогольдік масаң күйінде Ефимовка ауылының көшелерінде жүйіткіген. Дәл осындай қылығы үшін ер адамның екі рет әкімшілік жауапкершілікке тартылғаны анықталды. 2017 жылдың тамызында ол басқару құқығынан 3 жылға айырылған. Алайда, бұл спирттік ішімдік қызуымен рөльге отырған азаматқа сабақ болмады. Аталған факті ҚР Қылмыстық кодексінің 346-бабы бойынша Сотқа дейінгі тергеп-тексерудің бірыңғай тізіліміне енгізілді.

«Аудандық соттың шешіміміен ол алты айға бас бостандығынан және өмір бойына көлік басқару құқығынан айырылды. Жазаны ауырлататын мән-жай: құқық бұзушылықтың төтенше жағдай кезеңінде жасалуы», - дейді Ғабит Мүсірепов атындағы АПБ бастығы полиция подполковнигі Айдос Ідірісов.

Мас жүргізушілерге жазаны қатаңдататын заңнамадағы өзгерістер ағымдағы жылғы 11-ші қаңтардан заңды күшіне енгенін естеріңізге саламыз. Енді басқару құқығынан айырыла тұра, масаң күйінде рөльге отырған адам жүргізуші құқығынан өмір бойына айырылады. Сондай-ақ, бұндай желіккендер үшін айыппұлдан бас бостандығын айыруға дейінгі жаза қарастырылған.

Жыл басынан Солтүстік Қазақстан облысында осындай 20 факті тіркелген.

СҚО ПД баспасөз қызметі