Жүргізуші мен жолаушылар СҚО патрульдік полицейлеріне алғыс айтты

Ақмола облысының екі тұрғыны және РФ тұратын олардың ағасы СҚО ПД патрульдік полиция батальонының қызметкерлеріне алғыс білдірді. Олардың Волга көлігі Новотроицктің маңындағы Челябі – Новосібір трассасының 600 шақырымында сынып қалған. Ұялы байланыс желісі бұл жерде істемейді. Жол-жөнекей басқа көліктер тоқтамай өте шыққан.

– Бағымызға орай, капоты ашық, жол жиегінде тұрған көлігімізді көріп, полиция қызметкерлері тоқтады (борт. №562). Полиция капитаны Сүлейман Нұрғалиев және полиция аға лейтенанты Николай Фоменко көліктегі ақауды жөндеу үшін бар күш-жігерін салды, – делінген хатта.

Тәртіп сақшылары аудан орталығы Булаевтан қажетті бөлшектерді іздеп тауып, май әкелді. Волганың ақаусыз жұмыс істеп тұрғанын көрген соң ғана, өз қызметтеріне кірісті.

– Қол ұшын созған ашық жандарға алғысымыз шексіз. Мамандығын жүрек қалауымен таңдаған полицейлердің бары бойға мақтаныш ұялатады, – дейді жол жүрісінің қатысушылары.

Сүлейман Нұрғалиевтың айтуынша, демалыс кезінде – патрульдік полицейлердің жұмысы арта түседі. Республикалық маңызы бар жолдардағы көлік саны көбейіп, көліктердің сынуы жиі кездеседі.

– Біз тек өз жұмысымызды атқарамыз. Бағытқа шыққан кезде жолдарда қиын жағдайға тап болған адамдарға көмек көрсетуге нұсқау аламыз. Біздің жұмысымыздың мақсаты – әрбір көліктің барар жеріне аман-есен жетуі, – дейді ол.

Полицейлер автокөлік жүргізушілерінен алыс сапарға шыққан кезде көлік құралының техникалық жағдайына көз жеткізіп, жол қозғалысы ережелерін қатаң сақтауды сұрайды.

#ҚРІІМ #МВДРК #QRIIM #MVDRK #Polisia #Полиция #Police #SQOPD #SQO_PD #СҚО_ПД #ДПСКО #СҚО_полицейлері #полицейские_СКО