«Газпромға» жұмысқа орналаспақшы болған Петропавл қаласы тұрғыны интернет-алаяқтың құрығына түсті

Интернеттегі хабарландыру арқылы жұмысқа орналаспақшы болған Петропавл қаласының тағы бір тұрғыны алаяқтың құрығына түсті. Жәбірленуші веб-ресурстардың бірінде ресейлік «Газпром» ААҚ-ға жұмысқа орналастыру туралы хабарландыруды байқайды. Әйел көрсетілген нөмірге хабарласады, әңгіме барысында оған еңбек шартын ресімдеу үшін медициналық сақтандыруға төлем жасау қажеттігін айтқан. Жәбірленуші Qiwi-әмияннің нөміріне 150 доллар жібергеннен кейін «жұмыс беруші» байланысқа шықпай қойған. Алаяқтың құрбанына айналған Петропавл тұрғыны полицияға жүгінді. Аталған факті Сотқа дейінгі тергеп-тексерудің бірыңғай тізіліміне ҚР Қылмыстық кодексінің 190-бабы «Алаяқтық» бойынша енгізілді. Жедел-іздестіру іс-шаралары жүргізілуде.

«Хабарландыру бойынша жұмысқа орналастыру – соңғы кезде осы тәсілді алаяқтар жиі пайдалануда, - деді СҚО Полиция департаменті Криминалдық полиция басқармасының ерекше тапсырмалар жөніндегі аға жедел уәкілі полиция майоры Виталий Подчернин. – Алаяқтардың құрығына түспеу үшін жұмысқа орналасу сияқты мәселелер жеке кездесу арқылы шешілетінін естен шығармаған жөн. Алаяқтар жұмысқа орналастырамын деп, көп жағдайда медициналық сақтандыруға, сондай-ақ жеке құжаттардың фотосына ақша жіберуді сұрайды. Қандай жағдай болмасын, ақша жіберуге болмайды. Құжаттардың фотосы кейін басқа адамдарды алдауға немесе жәбірленушілердің атына несие ресімдеуге пайдаланылуы мүмкін».

Сондай-ақ, полицейлер интернет-алаяқтық кең таралған қылмыс түрі екенін атап өтті. Жыл басынан Солтүстік Қазақстан облысында осындай 9 факті тіркелді. Өткен жылы облыста 495 интернет-алаяқтық жасалған.