СҚО жолдарында мұзтайғақ қаупіне байланысты полицейлер жарты күнде 500-ден астам көлікті ілесіп алып жүрді

30 желтоқсан күні таңертең ауа райының күрт жылынуына байланысты Солтүстік Қазақстан облысынан Ақмола облысына шығатын барлық автожолдар жабылды. Көршілес өңірде жаңбыр жауып, жолдарда мұзтайғақ қаупі туындады. Елдің ең солтүстік өңірінде полиция көлік қозғалысын патрульдік автокөліктердің ілесуімен ұйымдастырылған колонналар арқылы қамтамасыз етті.

Жұмыс екі бағытта жүргізіліп, көршілес облыстағы әріптестермен іс-қимыл үйлестірілді. Жол-көлік оқиғаларының алдын алу шаралары аудандарда және облыс орталығында да күшейтілді.

Жолдар ашылғаннан кейін де тәртіп сақшылары күшейтілген дайындық режимін сақтап отыр. Жүргізушілерге ескертіледі: мұзтайғақ қаупі әлі де сақталуда, түнгі уақытта жолдарды қайта жабу туралы шешім қабылдануы мүмкін.

Мұз қатқан жолдарда қозғалған кезде жылдамдық режимін қатаң сақтау, көліктер арасындағы арақашықтықты барынша ұлғайту, күрт маневрлерден бас тарту қажет. Мүмкіндігінше алыс жолға шықпаған жөн.