СҚО полицейлері бір тоннадан астам артемий салина шаяндарын тәркіледі

Солтүстік Қазақстан облысының Мамлют ауданында полицейлер Артемий салинаның 36 қабын тәркіледі. Көл иесі Меңгесер ауылының маңындағы су қоймасынан шаян ұрлау фактісі бойынша аудандық полиция бөліміне хабарласқан. Оқиға орнына барған полицейлер шаян жинап жатқан Бескөл ауылының төрт тұрғыны мен петропавлдықты ұстады. Оқиға орнында шаян тәрізділермен толтырылған 33 қап анықталды. Тағы үшеуі жақын маңдағы ауылдағы үйден алынды.

«Ұрлық фактісі бойынша ҚР Қылмыстық кодексінің 3-бөлігі 188-бабы бойынша сотқа дейінгі тергеу басталды. Тәркіленген заттардың жалпы салмағы бір тонна 347 келіні құрады. Шығын мөлшері миллион теңгеден асты», - деді Мамлют ауданы полиция бөлімінің бастығы полиция подполковнигі Серік Әлжанов.