Кәсібилігі үшін алғыс

Полиция қызметкерлерінің жұмысына қатысты оң пікірлер – өңірдегі қоғамдық тәртіпті күн сайын күзетіп жүрген қызметкерлер еңбегінің көрсеткіші.
Кезекті алғыс Павлодар облысы Полиция департаментінің бастығы Василий Склярдың атына келіп түсті. Павлодар қаласының тұрғыны Павлодар қаласы Полиция басқармасының киберқылмысқа қарсы іс-қимыл бөлімінің жедел уәкілі Дастан Жұмағұлға кәсібилігі мен жеделдігі үшін ризашылығын білдірді.
- Мен алаяқтардың құрбаны болғандықтан, Павлодар қаласы Полиция басқармасының киберполиция бөліміне жүгіндім. Жедел уәкіл Дастан Жұмағұл сол күні-ақ ұрланған қаражат өткен шоттардың иесі – дроперді анықтады. Полиция қызметкерінің жедел жұмысының арқасында ақшам толықтай өзіме қайтарылды, – деп жазды павлодарлық тұрғын өз алғысында.
Павлодар облысының Полиция департаменті азаматтарға қырағы болу қажеттігін тағы да еске салады. Төмен баға мен тегін жеткізу туралы ұсыныстарға алданып қалмаңыздар, өйткені бұл интернет-алаяқтардың құрған тұзағы болуы мүмкін. Тек сақтық пен мұқияттылық таныту арқылы ғана алаяқтардың құрбаны болу қаупінің алдын алуға болады.