«Жақсылығыңыз өзіңізге оралсын!»- Павлодар полициясына құтқарғаны үшін алғыс түсті

Ішкі істер органдарында қызмет ету жай ғана жұмыс емес, ол жастайынан азаматтардың тыныштығы мен қауіпсіздігін қорғауды қалайтындар үшін нағыз кәсіп. Павлодар облысы Полиция департаментінің бастығы Василий Склярдың атына Павлодар қаласы ПБ Оңтүстік полиция бөлімі ювеналдық полиция тобының аға инспекторы Қайыргүл Ибраеваның жауаптылығы мен кәсібилігі үшін кезекті алғыс түсті.

– Кішкентай ұлым екеумізге көмек керек кезде шетте қалмағаны үшін Қайыргүл Ғосманқызына алғысымды білдіргім келеді. Егер полиция қызметкері бізге көмектеспесе, бізге не болуы мүмкін екенін білмеймін. Осындай қызметкерлер бар екеніне рахмет! - деп жазды Екібастұз қаласының тұрғыны Сания Сүлейменова.

Бірнеше күн бұрын сағат 01.30 шамасында кезекті жаттығудан кейін аға инспектор Қайыргүл Ибраева үйге Ленин кентіне таксимен оралды. Қайыргүл жолдың шетінде көлік тұрғанын, ал оның жанында ер адам әйелді ұрып жатқанын байқады. Жақын жерде бір бала тұрды.

Жүргізушіден тоқтауын сұрағаннан кейін Қайыргүл Ибраева бірден көліктен шығып, оларға қарай жүгірді. Полицейді көргенде күйеуі ұрып-соққан әйел көмекке шақырып айқайлай бастады.

Ер адам форма киген полицейді көрген бойда тоқтап, көлікке мініп, кетіп қалған. Қайыргүл Ибраева зардап шеккен әйелді баласымен бірге таксиге отырғызды, «102» нөміріне қоңырау шалып, олармен бірге автопатрульдің келуін күтті.

Сондай-ақ, полиция қызметкері әйелдің телефон нөмірін алып, оның жақсы екенін білу үшін мезгіл-мезгіл қоңырау шалды.

Ауруханаға барғаннан кейін әйелдің денесінің көгергені анықталды. Ол сондай-ақ оны ұрып-соққан бірге тұратын адамның үстінен арыз жазды.

Осы факті бойынша полиция қызметкерлері отбасы-тұрмыстық қатынастар саласында құқыққа қайшы әрекеттер жасағаны үшін осы адамға қатысты ҚР ӘҚБтК-нің 73-бабы бойынша әкімшілік іс қозғады. Сондай-ақ, ер адамға қорғаныс туралы бұйрық шығарды.