Маңғыстауда бейнекамералардың көмегімен 150-ге жуық қылмыс ашылды

Қоғамдық қауіпсіздікті қамтамасыз етуде, құқық бұзушылық пен қылмыстың алдын алуда Жедел басқару орталығы бейнекамераларының рөлі айтарлықтай. Тәртіп сақшыларының мұндай сенімді “көмекшілері” бейне камералар облыс орталығындағы және Жаңаөзен қаласындағы көшелер мен адамдар жиналып, демалатын алаңдарда, көше қиылыстарында және көп қабатты үйлердің аулаларында орналастырылған.

Жедел басқару орталығының қызметкерлері тәулік бойы қаладағы тәртіпті қадағалап отырады. Маңғыстауда биылғы жыл басынан бейнекамераның көмегімен 26 184 әкімшілік құқық бұзушылық анықталып, 149 қылмыс ашылды. Құқық бұзушылықтардың арасында көшеде, қоғамдық орындарда алкогольдік ішімдіктерді ішу немесе масаң күйде жүру, шылым қалдығын, қоқыстарды қалдыру, ұсақ бұзушылықтары жиі орын алады.

2022 жылдың сегіз айында “102” жедел желісіне келіп түскен азаматтардың шақыртуларының 20 мыңнан астамы тіркелген.

Сонымен қатар, бейнекамералардың “көзінен” жол қозғалысы ережелерін бұзғандар да тыс қалмайды. Жыл басынан бері осындай 12 мыңға жуық факті анықталып, құқық бұзушылар әкімшілік жауапкершілікке тартылды.