72 жастағы ақсақал-саяхатшыны маңғыстаулық жол сақшылары қарсы алды

Ұлытаулық егде жастағы саяхатшы Сәрсенбай Қотырашов Маңғыстау өңіріне жаяу келді. Ақсақалды Бейнеу-Боранқұл тас жолында Маңғыстау облысы ПД Патрульдік полиция ротасының қызметкерлері құшақ жая қарсы алды.

Айта кетейік, 72 жастағы ақсақал-саяхатшы Қазақстан бойынша сапарын сәуір айында бастаған болатын. Ол ел аймақтарын жаяу жүріп өтіп, бүгінде Бейнеу ауданына жетті.
Оның айтуынша, ол бұл сапарды алты жыл бұрын жоспарлаған.

Қарағанды облысынан батыс өңірге қарай жол тартқан саяхатшының ең соңғы тоқталатын нүктесі — Ақтау қаласы. Ақсақалды күтіп алған патрульдік полицейлер - лейтенант Н.Шыңғыс пен аға сержант Қ.Пиржанов оның хал-жағдайын біліп, алдағы сапарына ақ жол тіледі.

Ілтипатқа ие болған ақсақал-саяхатшы тәртіп сақшыларының көмек қолын созып, көрегендік танытқанына шексіз ризашылығын білдірді. «Үлкенге құрмет көрсету — адамгершіліктің нышаны», - деп есептейді жол сақшылары.