Ардагерлер Полиция департаментінің бастығы мен басшы құрамына алғыс білдірді

Маңғыстау облысы Полиция департаментінде “Жаңа жағдайдағы Қазақстан: іс-қимыл кезеңі” атты Мемлекет басшысының 2020 жылғы 1 қыркүйектегі Қазақстан халқына жолдауы аясында Ішкі істер министрі Е.Тұрғымбаевтың тапсырмасымен ІІМ Кадр саясаты департаментінің имидждік іс-шаралары департамент басшысы Ж.Бақтыбаевтың басшылығымен тұрақты түрде жүргізіліп тұрады.

   Солардың бірі, 2020 жылы 11 қарашада Полиция департаментінде өткізілген – Ішкі істер органдары ардагерлерімен кездесу шарасы.

  Маңғыстау облысының Полиция департаменті көненің көзі деп есептейтін қадірлі ардагерлерін ешқашан да ұмыт қалдырған емес. Еліміз үшін осынау қиын кезеңде, олардың хал-жағдайларына, тұрмыс жағдайларына алаңдаушылық танытып, барлық жағынан қолдау көрсетуде. Қазіргі әлем басына төнген дерттің салдары полиция қызметкерлерінің жұмыла жұмыс жасауын талап етеді. Осы тұста және өзге де полицияның тікелей міндеттерін атқаруда жас буынға ардагерлердің ақыл-кеңестері артық етпесі анық.

  Іс-шара барысында, ардагерлер департамент мұражайында болып, ондағы құнды жәдігерлермен танысты. Өздерінің қызметтік жолдарын, бастан кешкен оқиғаларын еске алып, осылайша өткен шаққа ойша сапар шеккендей керемет сезімде қалғандарын айтып жеткізді.

  Іс-шара ПД, қала, аудан кадр саясаты бөлімінің басшы құрамдары мен полиция ардагерлерінің қатысуымен өткізілген дөңгелек үстелмен жалғасын тапты. Ашық алаң, еркін пікірталас жүргізіліп, ардагерлердің ұсыныстары мен сұраныстарына құлақ түрілді. Бүгінгі күнде,  Полиция департаментінің бастығы Ж.Бақтыбаевтың тікелей тапсырмасымен қала, аудан бойынша әр учаскелік полиция пункттеріне бір-бірден ардагер тағайындау бойынша жұмыстар жүргізілуде. Ондағы мақсат – қазіргі кезде қызмет атқарушы полиция қызметкерлері мен ардагерлердің арасындағы байланысты нығайту, сонымен қатар, екі буындағы ойлар мен екі буындағы көзқарастарды тоғыстыра отырып, халықпен тиімді әрі тығыз байланыс орнату.

  Қандай жағдай болмасын полиция мен халықтың арасы алшақтап кетпеуі қажет. Осы мақсатта Полиция департаментінде полиция қызметкерінің имиджін қалыптастыруда тұрғылықты жұмыстар атқарылуда. Ал, ардагерлерді қазіргі полиция қызметіне араласуға жұмылдыру, имидж қалыптастыру барысындағы бір аспект болып есептеледі.
 
Әсерлі де мазмұнды өткен шара соңында ардагерлер Полиция департаментінің бастығы Ж.Бақтыбаев пен басшы құрамға өз алғыстарын білдірді.