Қарағанды облысының полиция департаментінің ғимаратында киберқылмыстарды тергеу орталығы ашылды

Қарағанды облысының полиция департаментінің ғимаратында киберқылмыстарды тергеу орталығы ашылды. Полицейлердің ауқымды профилактикалық жұмысына қарамастан, адамдар алаяқтардың арбауына әлі де түсуде. Биылғы жылдың басынан бері облыс полицейлері интернет-алаяқтықтың 1129 фактісін тіркеп, оның 436-сы ашылды. -Бүгінде азаматтарды толғандыратын мәселелердің бірі – интернет-алаяқтық. Тек соңғы төрт жылдың ішінде Қарағанды облысында құқық бұзушылықтың осы түрінен келтірілген жалпы шығын 3,5 миллиард теңгеден астамды құрады. Ал киберқылмыспен күрес – құқық қорғау органдары жұмысының негізгі бағыттарының бірі. Қарағанды, Теміртау және Балқаш қалаларының ішкі істер бөлімдерінде бұрын ашылған киберполиция бөлімшелері өз тиімділігін көрсетті. Ал Орталықтың міндеті – олардың арасындағы үйлестіру мен өзара іс-қимылды күшейту, сол арқылы цифрлық технологиялар саласындағы қылмыспен күрестің тиімділігін арттыру», – дейді облыстық полиция департаменті бастығының орынбасары Рашад Утеуов. Сонымен, Қарағанды қаласы ПБ Оңтүстік-шығыс полиция бөлімі Қарағанды облысының тұрғындарына қатысты интернет-алаяқтық бойынша 11 эпизод бойынша қылмыстық істі аяқтады. Бас айыпталушы 18 жастағы жас жігітке сот үкім шығарды.