Саран қаласында көршісінің атына екі тауарлық несие рәсімдеген күдіктілер ұсталды

Саран қаласында көршісінің атына екі тауарлық несие рәсімдеген күдіктілер ұсталды.
Қарағанды облысы, Саран қалалық полиция бөліміне 43 жастағы қала тұрғыны арызбен шағымданды. Жәбірленуші арызында белгісіз біреулер оның ұялы телефондағы банк қосымшасын пайдалану арқылы жалпы құны 895 мың теңгеге тауарлық несие рәсімдегенін айтты. Бұл деректі жәбірленуші ұялы телефонына несие төлеу қажеттігі туралы хабарлама келгенде бірақ білген.
Белгілі болғандай, осыдан екі апта бұрын жәбірленушінің үйінде бұрын көрші тұрған 26 мен 31 жас аралығындағы екі азамат қонақта болған. Олар полиция қызметкерлері тарапынан негізгі күдіктілер санатына ілінді. Криминалдық полиция қызметкерлерімен жүргізілген кешенді іс-шаралар барысында жоғарыда көрсетілген азаматтар ұсталып, жауап алу барысында мойындау көрсетпе белгілерін берді. Күдіктілер жәбірленушінің сенгіштігін пайдаланып, ұялы телефонын алып, ол арқылы екі тауарлық несие рәсімдеген. Аталған дерек бойынша Қазақстан Республикасы Қылмыстық Кодексінің 190 бабына сәйкес қылмыстық іс қозғалды. Тергеу амалдары жүргізілуде.