ОТБАСЫ ҚҰНДЫЛЫҚТАРЫНЫҢ САҚШЫЛАРЫ: ПОЛИЦЕЙЛЕР ҚЫЗМЕТ АРДАГЕРІН ОТБАСЫ КҮНІМЕН ҚҰТТЫҚТАДЫ

«Шаңырақ күні» мерекесінде облыстық әкімшілік полиция басқармасының қызметкерлері Ғазиз Мырзабаев ардагерінің отбасына барып, құттықтап қайтты. Жары Айман екеуі өмір жолында 22 жыл бойы бірге қол ұстасып келеді. Бірге бес бала тәрбиелеп, берік отбасы мен дәстүрге адалдықтың үлгісі болып қала береді.

Қауіпсіздік қамтамасыз етуде 35 жыл қызмет етіп, өңірдегі тәртіпке зор үлес қосты. Бүгінде ол өз өмірлік тәжірибесін өскелең ұрпаққа жалғастырып, балаларды Отанға деген құрмет, жауапкершілік, сүйіспеншілік рухында тәрбиелеуде.

– Отбасы – әр адамның өміріндегі басты тірек. Әсіресе, адалдық пен жанқиярлықты талап ететін полиция қызметкерлері үшін бұл өте маңызды. Ғазиз Мырзабаев сынды жандар кәсібиліктің ғана емес, мықты отбасылық құндылықтардың да жарқын үлгісі болып табылады, – деп атап өтті облыстық әкімшілік полиция басқармасының бастығы Еркебұлан Ахметов.

Полицейлер қызмет ардагеріне құқықтық тәртіпті дамытуға қосқан үлесі үшін шынайы алғысын білдіріп, отбасына амандық, зор денсаулық тіледі. Құрмет белгісі ретінде естелік сыйлықтарын ұсынып, дәстүрлі дастархан үстінде жылы әңгіме құрды.

«Шаңырақ күні» – бұл жай ғана мереке емес, отбасының маңыздылығын, аға буынға құрмет көрсетуді және дәстүр сабақтастығын еске салатын ерекше күн. Осындай кездесулер бірлікті нығайтып, қоғамдағы отбасылық құндылықтардың маңыздылығын айшықтайды.