АЛМАТЫ ОБЛЫСЫНДА «ТҮНГІ ҚАЛАДАҒЫ БАЛАЛАР» ПРОФИЛАКТИКАЛЫҚ ІС-ШАРАСЫНЫҢ ҚОРЫТЫНДЫСЫ ШЫҒАРЫЛДЫ

27 ақпан мен 1 наурыз аралығында Алматы облысының полиция қызметкерлері «Түнгі қаладағы балалар» жедел-профилактикалық іс-шарасын өткізді. Рейдтердің басты мақсаты – кәмелетке толмағандар арасындағы құқықбұзушылықтардың алдын алу, олардың құқықтары мен мүдделерін қорғау, сондай-ақ ата-аналардың балаларының тәрбиесіне жауапкершілігін арттыру болды.

– Іс-шара барысында 474 әкімшілік құқықбұзушылық анықталды. Олардың қатарында ата-аналардың бала тәрбиесіне қатысты міндеттерін тиісінше орындамауы, кәмелетке толмағандар арасындағы буллинг, 16-18 жас аралығындағы жасөспірімдердің ұсақ бұзақылық жасауы, кәмелетке толмағандардың қоғамдық орындарда алкогольдік ішімдік ішуі және заңды өкілдерінің еріп жүруінсіз сағат 23:00-ден кейін көшеде жүруі бар, – деп хабарлады полиция қызметкерлері.

Профилактикалық шаралар аясында бала тәрбиесіне қатысты міндеттерін бұзған 19 ата-ана есепке қойылды. Сондай-ақ, полиция қызметкерлері есепте тұрған 152 кәмелетке толмағанды және 190 қолайсыз отбасыны тұрғылықты мекенжайы бойынша тексерді.

Профилактикалық әңгімелер өткізу және әкімшілік хаттамалар жасау мақсатында полиция бөлімшелеріне 446 кәмелетке толмаған жеткізілді, олардың 365-і – түнгі уақытта көшеде жүргені үшін.