АЛМАТЫ ОБЛЫСЫНДА АЛҒЫС АЙТУ КҮНІНЕ ОРАЙ САЛТАНАТТЫ ІС-ШАРАЛАР ӨТТІ

Алғыс айту күніне орай бүкіл ел бойынша құрмет, өзара көмек және азаматтық бірлікті нығайтуға бағытталған салтанатты іс-шаралар өтті. Бұл күні қоғамның дамуы мен тәртіпті сақтауға елеулі үлес қосқан жандарға шынайы алғыс сөздері айтылды.

Министрдің атынан жеке алғыс хаттар табысталды. Осы мақсатта барлық ауылдарда ақсақалдар кеңестері арқылы тізімдер жасалып, қалаларда кооперативтер мен тұрғын үй иелері бірлестіктерінің белсенді өкілдері анықталды.

– Құрмет пен ризашылық белгісі ретінде аудандық бөлім басшылары ауылдық елді мекендерге арнайы барып, ақсақалдармен кездесіп, оларға Министрдің атынан алғыс сөздерін жеткізді. Қалаларда полиция қызметкерлері кооперативтер мен тұрғын үй иелері бірлестіктерінің төрағаларына алғыс білдіріп, олардың тұрғын үй кешендеріндегі тәртіп пен әл-ауқатты қамтамасыз етудегі маңызды рөлін атап өтті, – деді Алматы облысы ПД бастығы Мейрам Әбікеев.

Қоғамдық өмірге белсене араласып, мұқтаж жандарға көмек көрсетіп, тәртіпті сақтауға ықпал етіп жүрген еріктілерге де ерекше алғыс айтылды.

Министрдің атынан Алматы облысында ақсақалдар, кооперативтер мен тұрғын үй иелері бірлестіктерінің өкілдері, сондай-ақ еріктілер қатарынан 136 тұрғын құттықталды. Олардың азаматтық бірлікті, көршілестік қарым-қатынасты және қоғамдық әл-ауқатты нығайтуға қосқан үлесі алғыс хаттармен марапатталды.

Алғыс айту күні – бұл жай ғана мереке емес, азаматтық келісімді нығайтып, көршілестік қарым-қатынасты қолдап, қоғам дамуына өлшеусіз үлес қосып жүрген жандарға деген құрмет пен алғыс белгісі.