АЛМАТЫ ОБЛЫСЫНДА «ЖАСӨСПІРІМ» ЖПІШ БАРЫСЫНДА 500-ДЕН АСТАМ ҚҰҚЫҚ БҰЗУШЫЛЫҚ АНЫҚТАЛДЫ

Жасөспірімдер қылмысының алдын алу, оның ішінде мектеп оқушылары мен студенттер арасындағы құқық бұзушылықтардың жолын кесу, кәмелетке толмағандардың құқықтарын қорғау саласындағы әкімшілік құқық бұзушылықтарды анықтау, олардың құқықтық сауаттылығын арттыру, сондай-ақ балаларға қатысты қылмыстық қол сұғушылықтардың алдын алу мақсатында облыс аумағында «Жасөспірім» Республикалық жедел профилактикалық іс-шара өткізілді.

17-19 қыркүйек аралығында ЖПІШ аясында полицейлер білім беру, денсаулық сақтау, жергілікті атқарушы органдардың және қоғамдық ұйымдардың өкілдерімен бірлесіп рейдтік іс-шараларға шықты.

– Үш күндік жұмыс қорытындысы бойынша 572 әкімшілік құқық бұзушылық анықталды. Бұл кәмелетке толмағандардың заңды өкілдерінің еріп жүруінсіз ойын-сауық орындарында немесе тұрғын үйден тыс жерде болуының 366 фактісі, кәмелетке толмағандарды тәрбиелеу және оған білім беру, олардың құқықтарын және мүдделерін қорғау жөніндегі міндеттерін орындамағаны үшін - 132 дерек, ұсақ бұзақылық-18, бұзақылық - 27, қоғамдық орындарда алкогольдік ішімдіктерді ішудің 12 фактісі анықталды, – деп атап өтті Алматы облыстық ПД ЖПҚБ-да.
Іс шара барысында Талғар ауданының полицейлері оқушыдан электрошокер тапты. Оның ата-анасы жауапқа тартылды, бұл ретте кәмелетке толмағандармен профилактикалық әңгіме жүргізілді.
Сонымен қатар, алты ойын-сауық мекемесінің иелеріне және онда болған кәмелетке толмаған жасөспірімдердің ата-аналарына қатысты әкімшілік хаттама толтырылды.
Сондай-ақ, тәртіп сақшылары ЖПІШ өту кезінде профилактикалық есепке 26 жасөспірім және 28 ата-ана қойды. Кәмелетке толмағандардың бейімдеу орталығына 23 бала орналастырылды.

Жалпы, кәмелетке толмағандар мен олардың ата-аналарына кәмелетке толмағандар арасындағы құқық бұзушылықтың алдын алу саласында туындайтын мәселелер бойынша құқықтық және консультациялық көмек көрсетілді.