Алматы облысының 58 жастағы тұрғынынан 2 келі гашиш тәркіленді

Есірткі бизнесіне қарсы күрес басқармасының жедел уәкілдері Алматы облысының тұрғынын «Гашиш» есірткі затының ірі партиясын , яғни 2 кг 610 грамм есірткі затын сақтағаны үшін ұстады. Күдікті Алматы облысы Көксу станциясының 58 жастағы тұрғыны.
«Жедел-іздестіру іс-шараларының барысында тұрғын үйінде есірткінің ірі партиясын заңсыз сақтаған адам анықталды. Қызметтік-іздестіру иттерін пайдалана отырып санкцияланған тінту барысында диванның астынан ерекше иісті өсімдік заты бар полиэтилен пакеттер табылды. Тәркіленген зат қылмыстық іске қосылып, сараптамаға жіберілді», - деп хабарлайды Алматы облысы Полиция департаменті Есірткі бизнесіне қарсы күрес басқармасының бастығы, полиция полковнигі Қазбек Мұхамедов.
Жыл басынан бері полиция қызметкерлері 61 килограмнан астам есірткі затын тәркілеген. Оның 304 грамм героин, 57 кг марихуана және 2 кг гашиш.

Алматы облысы ПД баспасөз қызметі