Алматы облысында 100-ге жуық әскери қызметкер тосқауыл-бекеттердегі қызметі үшін марапатталды

Полицейлер әскери қызметкерлерге тосқауыл-бекеттердегі қызметі үшін алғыс білдірді.
Естеріңізге сала кетейік, төтенше жағдай режимінің аяқталуына байланысты тосқауыл бекеттердегі күшейту, елді мекендерді дезинфекциялау және патрульдеу мақсатында кезекшілікке тартылған Қазақстан Республикасы Қарулы Күштерінің жеке құрамы мен әскери техникасы өзінің тұрақты орналасқан пункттеріне оралды. Осыған орай, Қарасай аудандық полиция басқармасының басшылығы мен қызметкерлері Алматы маңындағы тосқауыл бекеттерде қызмет көрсеткен Қарулы Күштердің барлық жеке құрамына алғыстарын білдірді.
«Әскери қызметшілер алдыға қойылған мақсаттар мен міндеттерді орындау кезінде ерен еңбек атқарды. Төтенше жағдай режимі ел аумағында енгізілген сәттен бастап,ірі мегаполис Алматы қаласымен жанасатын бекеттерге 87-ден астам әскери гарнизон қызметкерлері тартылды. Бүгінде 100-ге жуық әскери қызметші өңір басшылығы мен Алматы облысы Полиция департаментінің атынан марапатталды. Қарулы Күштердің жеке құрамына шын жүректен алғыс білдіре отырып, мемлекет қауіпсіздігін, ел азаматтарының өмірі мен денсаулығын қамтамасыз ету және сақтау ісінде алдағы уақытта табыс тілейміз», - деп атап өтті Алматы облысы Қарасай аудандық полиция басқармасының бастығы, полиция полковнигі Асхат Данияр.
Ал полиция және медицина қызметкерлері Алматы маңындағы бекеттердегі қызметін әрмен қарай жалғастыруда.

 

Алматы облысы ПД баспасөз қызметі