АЛМАТЫ ОБЛЫСЫНДА ЕКІ КҮН ІШІНДЕ «ҚАУІПСІЗ ЖОЛ» АКЦИЯСЫ БАРЫСЫНДА 350-ДЕН АСТАМ ҚҰҚЫҚ БҰЗУШЫЛЫҚ АНЫҚТАЛДЫ

Алматы облысы полиция департаментінің патрульдік полиция батальоны қызметкерлері «Қауіпсіз жол» профилактикалық іс-шарасын жалғастыруда. Оның басты мақсаты – жол қозғалысына қатысушыларды жазалау емес, жол-көлік оқиғаларының алдын алу және адамдардың өмірін сақтау.

Негізгі назар жүргізушілер мен жаяу жүргіншілердің жол қозғалысы ережелерін сақтауына аударылуда. Патрульдер апатты-қауіпті учаскелерде бақылауды күшейтіп, түсіндіру жұмыстарын жүргізіп жатыр. Сондай-ақ қауіпсіздік белдігін тағудың, балаларға арналған арнайы құрылғыларды пайдаланудың және мас күйінде көлік жүргізуге жол бермеудің маңыздылығын еске салады.

Екі күн ішінде полиция қызметкерлері 350-ден астам құқық бұзушылықты анықтады. Оның ішінде екі жүргізуші көлікті мас күйінде басқарған, алты жағдайда жүргізушілер қарсы жолаққа шыққан, төрт көлік мемлекеттік тіркеу нөмірінсіз жүрген. Сонымен қатар 60-тан астам жаяу жүргінші жолды белгіленбеген жерден өткені үшін әкімшілік жауапкершілікке тартылды.

– Бұл акцияның мақсаты – әрбір жол қозғалысына қатысушы өз жауапкершілігін түсінуі. «Заң мен Тәртіп» тұжырымдамасы қатаң жазалауға емес, ең алдымен алдын алуға және адамдардың өмірін қорғауға бағытталған, – деп атап өтті тәртіп сақшылары.

Полицейлер тәртіп жолда әрбір азаматтан басталатынын айтады. Тек бірлескен күш-жігердің арқасында ғана жол-көлік оқиғаларын азайтып, жолдарды шынымен қауіпсіз етуге болады.