АЛМАТЫ ОБЛЫСЫНДА «ТАЗА ҚАЗАҚСТАН» АКЦИЯСЫ ӨТУДЕ

8–21 қыркүйек аралығында табиғатты қорғау полициясының қызметкерлері қоршаған ортаны қорғауға және экологиялық құқық бұзушылықтардың алдын алуға бағытталған профилактикалық іс-шаралар жүргізуде.

– Рейд барысында заңсыз балық аулау мен аңшылық фактілері, жағалау өсімдіктерін кесу, сондай-ақ су айдындарында болу ережелерін бұзу жағдайлары тексерілуде. Негізгі назар қоршаған ортаны ластаумен және экологиялық заңнаманы сақтамаумен байланысты құқық бұзушылықтарды алдын-алуға аударылған, – деп хабарлады тәртіп сақшылары.

Негізгі басымдық «Таза Қазақстан» акциясына берілді. Полиция қызметкерлері Балқаш-Алакөл өңіраралық бассейндік балық шаруашылығы инспекциясымен бірлесіп, Қапшағай су қоймасының жағалауларын тазарту жұмыстарын жүргізді.

Полицейлердің айтуынша, мұндай іс-шаралар «Заң мен тәртіп» тұжырымдамасы аясында жүзеге асырылып, табиғатты қорғауға, су ресурстарын ұқыпты пайдалануға ғана емес, сондай-ақ халық арасында экологиялық мәдениетті, қоршаған ортаға жанашырлықты және заңға құрметті қалыптастыруға бағытталған.