Абай облысында "Жолдағы балалардың қауіпсіздігі" акциясы қорытындылды.
Балалардың жол-көлік жарақаттануының алдын алу, көшелер мен жолдардағы қауіпсіз мінез-құлыққа байланысты дағдыларды бекіту мақсатында ағымдағы жылдың 27 наурызы мен 10 сәуірі аралығында Абай облысының аумағында "Жолдардағы балалардың қауіпсіздігі" кең ауқымды акциясы өткізілді. Бұл алдын алу іс-шара жергілікті атқарушы органдардың, денсаулық сақтау, білім беру органдарының, сондай-ақ мүдделі азаматтық қоғам институттары мен бұқаралық ақпарат құралдарының өкілдерімен бірлесіп өткізілді.
Акция аясында полиция қызметкерлері көше-жол желісіне жақын орналасқан 304 жалпы білім беру мекемесін тексерді, нәтижесінде анықталған кемшіліктерді жою туралы 216 ұйғарым берілді, сондай-ақ 131 жол белгісін ауыстыру және орнату бойынша жұмыстар жүргізілді. Оқу орындарының балансындағы 398 мектеп автобусына техникалық тексеру жүргізілді.Өткізілген кең ауқымды акцияның 14 күнінде тәртіп сақшылары 3 800-ден астам жол қозғалысы ережелерін бұзғанын анықтады.
Осылайша, полицейлер жаяу жүргіншілер өткелдерінің жүру ережелерін бұзған 180-нен астам жүргізушіні, балаларды тасымалдау және балаларды ұстау құрылғыларын пайдалану ережелерін бұзған 190-нан астам жүргізушіні әкімшілік жауапкершілікке тартты.
"Аталған акция аясында полиция қызметкерлерінің негізгі міндеті жалпы білім беру мекемелерінің оқушылары арасында кең ауқымды профилактикалық түсіндіру жұмыстарын жүргізу болды", - деп атап өтті жергілікті полиция қызметі басқармасының бастығы полиция полковнигі Әсет Өтепов.
Бұл жұмыс жас қозғалыс инспекторларының қатысуымен жоғары сыныптар арасында оқыту дәрістері мен семинарлар, ақпараттық дөңгелек үстелдер, кіші сыныптар арасында сабақтар мен ойындар түрінде ұйымдастырылды. Акция аясында полицейлер 760-тан астам профилактикалық түсіндіру іс-шараларын өткізді.
Абай облысы полиция департаментінің жергілікті полиция қызметі басқармасы ата-аналарды балаларды жас кезінен бастап жол қозғалысы ережелерін сақтауға үйретуге шақырады. Есіңізде болсын, жеке мысал-бұл Сіздің балаңыз үшін оқытудың ең түсінікті және тиімді түрі!