Абай облысында алты айда 468 интернет-алаяқтық дерегі тіркелді

Абай облысында интернет-алаяқтықтың алдын алу және киберқылмысқа қарсы іс-қимыл мәселелері Өңірлік коммуникациялар қызметінде өткен брифингте талқыланды.

 Абай облысы Полиция департаменті Киберқылмысқа қарсы іс-қимыл басқармасы бастығының орынбасары Мират Қабытаевтың айтуынша, 2026 жылдың алғашқы алты айында өңірде 468 интернет-алаяқтық дерегі тіркелген, оның 369-ы Семей қаласына тиесілі. Қазіргі уақытта 100-ден астам қылмыс ашылды.

 Алаяқтар көбіне әлеуметтік желілер, жалған инвестициялық жобалар, онлайн-несиелер, банк карталарын «қорғау», лотереялар және мессенджерлер арқылы әрекет етеді. Сондай-ақ олар өздерін банк немесе құқық қорғау органдарының қызметкерлері ретінде таныстырады.

 Полиция азаматтарды белгісіз қоңырауларға сенбеуге, күмәнді сілтемелерге өтпеуге және жеке деректерін ешкімге бермеуге шақырады.