Парламент Мәжілісінің жалпы отырысында бірінші оқылымда "үшінші елдермен өзара саудадағы техникалық кедергілерді жою тәртібі мен шарттары туралы келісімді ратификациялау туралы" заң жобасы мақұлданды, деп хабарлайды корреспондент Zakon.kz.
Пленарлық отырыста заң жобасын ұсына отырып, Премьер-Министрдің орынбасары – сауда және интеграция министрі Серік Жұманғарин келісімді ратификациялау отандық өнімді Еуразиялық экономикалық одақ (ЕАЭО) елдерінің нарықтарына жылжытуға бағытталғанын атап өтті.
"Келісім Одақтың техникалық регламенттері қолданылатын өнімге қатысты ЕАЭО-ға мүше мемлекеттердің үшінші елдермен өзара саудасындағы техникалық кедергілерді жою тәртібі мен шарттарын айқындайды". Серік Жұманғарин
Оның айтуынша, ЕАЭО-ның 52 техникалық регламенті қабылданып, оның 45-і күшіне енді.
Сондай-ақ, келісім өнімнің ЕАЭО-да және үшінші елдің аумағында белгіленген талаптарға сәйкестігін бағалау нәтижелерін өзара тануды көздейді. Бұл ретте, құжатқа сәйкес, мүше мемлекеттерде және үшінші елде қолданылатын сәйкестікті бағалау жөніндегі органдарды аккредиттеу рәсімдерінің баламалылығы қамтамасыз етілуге тиіс.
Келісімде бастапқыда қолданыстағы заңнаманың талаптары ескерілген, осыған байланысты оны ратификациялау ҚР Заңдарына өзгерістер енгізуге әкеп соқпайды.
Қасым-Жомарт Тоқаев 9 желтоқсанда Жоғары Еуразиялық экономикалық кеңестің отырысында Қазақстанның интеграцияны дамытуға шын жүректен және нақты мүдделі екенін атап өтті.