АЛМАТЫДА ТЕХНИКАЛЫҚ РЕГЛАМЕНТТЕРДІҢ ТАЛАПТАРЫНА СӘЙКЕС КЕЛМЕЙТІН АЙНАЛЫМДАҒЫ ӨНІМДЕРГЕ МОНИТОРИНГ ЖАСАУ БОЙЫНША ЖҰМЫС ТОБЫНЫҢ БІРІНШІ ОТЫРЫСЫ ӨТТІ

Техникалық реттеу және метрология комитетінің Алматы қаласы бойынша департаментінде жұмыс тобының бірінші отырысы өтті.

Аталған жұмыс тобы Қазақстан Республикасы Инвестициялар және даму министрлігі Техникалық реттеу және метрология комитеті төрағасының техникалық регламенттер талаптарына сәйкес келмейтін айналымдағы өнімдерге мониторинг жасау бойынша тапсырмасы аясында құрылды.

Жұмыс тобының құрамына Алматы қаласы бойынша мемлекеттік кірістер департаментінің, Алматы қаласының қоғамдық денсаулық сақтау департаментінің, Алматы қаласы әкімшілік полиция басқармасы Полиция департаментінің, Ветеринариялық бақылау және қадағалау комитетінің Алматы қаласы бойынша аумақтық инспекциясының өкілдері кірді.

Бірінші отырыста жұмыс тобының мүшелері техникалық регламенттердің талаптарына сәйкес келмейтін өнімдерді анықтау бойынша өз құзыреті шегінде мониторинг жүргізу, талдау жүргізу мәселелерін талқылады, сондай-ақ техникалық регламенттердің талаптарына сай келмейтін өнімдерді, сұр (жалған, сәйкестікті растау құжаттары берілген бірыңғай тізіліміне енгізілмеген) сертификаттарды анықтаған жағдайда жұмыс тобы мүшелеріне дереу хабарлап және Қазақстан Республикасының заңнамасы аясында осы өнімге қатысты шешім қабылдауға келісті.

Жұмыс тобының негізгі миссиясы, қауіпсіздікті сақтау, сондай-ақ Алматы қаласының және тұтас Республика азаматтарының заңды мүдделерін және құқықтарын қорғау болып табылады.