ҚАЗАҚСТАН ӘУЕДЕГІ ҰШУЛАРДЫҢ ҚАУІПСІЗДІК ДЕҢГЕЙІ БОЙЫНША ӘЛЕМДІК РЕЙТИНГТЕГІ ӨЗІНІҢ ПОЗИЦИЯСЫН ЖАҚСАРТТЫ.
2014 жылғы маусымдағы Халықаралық азаматтық авиация ұйымының (ИКАО) валидациялық миссиясының ұшу жарамдылығына қатысты қорытындысы бойынша ескертулері алынып тасталды. ҚР ИДМ Азаматттық авиация комитеті қызметінің ИКАО стандартына сәйкестілігі 47% -тен 65% өсті. Бұл туралы комитет төрағасы Бекен Сейдахметов хабарлады. Жалпы әлемдік орташа көрсеткіш 60%. Осы бағыттағы жұмыстар алдағы уақытта да жалғасады. Ендігі мақсат 2020 жылы 80% дейін жеткізу-деп атап өтті Астанада өткен баспасөз мәслихатында Азаматтық авиация комитетінің төрағасы. Оның айтуынша, «ИКАО-ның техникалық ынтымақтастық бюросының сарапшыларымен бірге барлық әуекомпанияларын қайта сертификаттау жүргізілді. 2009 жылы қазақстандық әуекомпаниялардың саны 70 болса, 2014 жылы 45-ке дейін қысқарды.
Тәжірибе алмасу мақсатында Түркия, Францияның авиация басшылығымен ұшу мерзімін қолдау бойынша бірлескен жұмыстар ұйымдастырылды» - деп атап өтті ҚР ИДМ Азаматттық авиация комитетінің төрағасы Бекен Сейдахметов. Барлық кемшіліктер жойылғандықтан «Эйр Астана» АҚ-на Еуропалық одақ елдеріне ұшуға қойылған шектеу 2014 жылы алынып тасталды. Азаматтық авиация комитеті ИКАО-ның сенімділікті тексеру миссиясын өткізуге дайын екені туралы хат жіберді.
Елімізде республикалық және облыстық маңыздағы 18 әуежай бар. Оның ішінде 13 әуежайдың ұшып-қону жолақтарына қайта жөндеу жұмыстары жүргізілді. (Ақтөбе, Атырау, Қызылорда, Павлодар, Астана, Ақтау, Алматы, Карағанды, Шымкент, Жезқазған, Тараз, Талдықорған, Көкшетау). Ал Семей, Қостанай, Өскемен қалаларындағы әуежайлардың ұшып-қону жолақтарын 2020 жылға дейін қайта жөндеу көзделіп отыр-деп атап өтті Бекен Сейдахметов.
Мемлекет басшысының «Нұрлы жол – болашаққа бастар жол» Жолдауы аясында Астана әуежайының жолаушылар терминалын қайта жөндеу жұмыстары жоспарланып отыр. Ондағы мақсат әуежай терминалының өткізу мүмкіндігін сағатына 750 жолаушыдан 1750 жолаушыға дейін арттыру немесе жылына 7 млн. жолаушыға дейін жеткізу.
Сондай-ақ, биыл Тараз әуежайының жолаушылар терминалын және Орал әуежайының ұшып-қону жолағын қайта жөндеу жұмыстары аяқталады. Ал келесі жылы Петропавл әуежайының ұшып-қону жолағы жөнделіп, пайдалануға беріледі.
ҚР ИДМ баспасөз-қызметі