Қазақстан Республикасының Индустрия және инфрақұрылымдық даму министрі Бейбіт Атамқұлов Қытай Халық Республикасының Қазақстандағы елшісі Чжан Сяомен телефонмен сөйлесті.

Тараптар екі ел арасындағы теміржол және автомобиль тасымалына қатысты өзекті мәселелерді және өткізу бекеттеріндегі жағдайды талқылады.

Сондай-ақ шекара өткелдерінде жүк автокөліктерін өткізуді арттыру және Достық-Алашанькоу халықаралық аралығында жүк вагондарын технологиялық өңдеуді күшейту жайы сөз болды. Биылғы 6 айдың қорытындысында «Бір белдеу – Бір жол» Жібек жолы бағытымен транзиттік контейнерлік тасымалдау көлемі 64% артты. Достық-Алашанькоу шекара өткелі арқылы жүк тасымалы 22%, Алтынкөл – Қорғас арқылы 58% ұлғайды.

Жалпы биыл бірінші жартыжылдықта екі ел арасындағы жүк теміржол тасымалының көрсеткіші 30% артты. Бұған коронавирус пандемиясына қатысты жағдайдан кейін Қытай экономикасының қалпына келуі оң ықпал етті.