ҚР ИИДМ ұжымы интеллектуалдық сайыста жүлделі орынды иеленді

 Мемлекеттік қызметшілер күніне орай Астана қаласы әкімдігінің Тілдерді дамыту және архив ісі басқармасымен «Қазақша Quiz» интеллектуалдық сайыс ұйымдастырылды.

Көзделген негізгі мақсат — ұлтымыздың тарихын, салт-дәстүрін, әдет-ғұрпын, тілін, әдеби мұраларын насихаттау, сонымен бірге ұжыммен жұмыс жасау дағдыларын арттыру және қатысушылардың логикалық ойлау қабілетін одан әрі жетілдіру. Додаға жалпы саны 13 команда жасақталып, ойын барысында қатысушылар асқан белсенділік танытты. Зияткерлік сайыстың әрбір кезеңінде 5-10 сұрақтан қойылды. Куиз 5 кезеңнен құралды.

Республика деңгейінде жастар арасында кең танымал ойынның қорытындысы бойынша ең көп ұпай жинаған үш топ марапатталды. Осылайша, Қазақстан Республикасы Президентінің жанындағы Мемлекеттік Басқару академиясы қызметкерлерінен жасақталған команда жеңіс тұғырынан көрінсе, Астана қаласы әкімдігінің Nomad city hall командасы 2-орында тұрақтады.  Ал Индустрия және инфрақұрылымдық даму министрлігі қызметкерлерінен жасақталған команда жарыста жүлделі үшінші орынды иеленді. Ойын барысында белсенділік танытқан командалар алғыс хаттар және сыйлықтармен марапатталды.

Жалпы “quiz” сөзі ағылшын тілінен аударғанда сауал­нама деген мағынаны білдіреді. Ойын ретінде шамамен 1975 жылдар­ы танымал бола бастаған. Сайыста қатысушылар топ болып бірігіп, сұрақтарға тапқырлықпен тез әрі шап­шаң жауап беруден бөлек, логикамен де сыналады.