Марат Қарабаев азаматтық авиацияның дамуын тежеп тұрған негізгі факторларды айтты

ҚР Премьер-Министрі Әлихан Смайыловтың төрағалығымен өткізілген Үкімет отырысында Қазақстанның азаматтық авиациясын дамыту мәселесі қаралды.

Алқалы жиында Индустрия және инфрақұрылымдық даму министрі Марат Қарабаев отандық авиация саласындағы негізгі өзекті мәселелерді тізбектеп шықты.

«Азаматтық авиация саласына тұсау салып тұрған факторлардың бірі ішкі нарықтағы авиаотынның тапшылығы және оның қымбаттылығы болып тұр. Сол себепті отандық әуежайлар көршілес елдердегі әріптестерімен салыстырғанда транзиттік компанияларды тартып, оларға қызмет көрсету жағынан бәсекелестігін жоғалтып жатыр. Бұл Қазақстанның транзиттік әлеуетіне жағымсыз әсер етеді», деді Марат Кәрімжанұлы.

Авиаотын нарығындағы тұрақсыз жағдайға байланысты әуе компаниялар жаңа халықаралық рейстерді ашу бойынша сұранысты қанағаттандыруға қауқарсыз. М. Қарабаевтың айтуынша, өзекті мәселені жүйелі түрде шешу үшін жағармай өндірісінің жыл сайынғы көлемін ұлғайту қажет. Бұл ішкі нарықтағы тапшылық пен импортқа тәуелділікті алдын алуға мүмкіндік береді.

Бұған қоса білікті мамандардың тапшылығы мен әуе көлігі инфрақұрылымына қатысты біраз мәселе саланы өркендетуге кедергі келтіріп отырғаны белгілі болды.

Қазір азаматтық авиацияда 20 мыңға жуық адам жұмыс істеп жатыр. 2025 жылға қарай әуе саласының мамандарына деген қажеттілік ұлғаяды деп болжанып отыр.

«Қажетті маман тапшылығы мәселесін шешу мен студенттеріміздің еңбек нарығындағы бәсекеге қабілеттілігін арттыру үшін Ғылым және жоғары білім министрлігімен бірлесіп, еуропалық стандарттарға көшу арқылы азаматтық авиация саласына кадр даярлау жүйесін түбегейлі реформалап, сондай-ақ оқу процесін ИКАО-ның озық стандарттарына сай жолға қою мәселесі қарастырылып келеді», деді М.Қарабаев.