АСТАНАДАҒЫ LRT ҚҰРЫЛЫСЫНА 16,2 МЛРД. ТЕҢГЕ БӨЛІНДІ

Үкімет отырысында баяндама жасаған ҚР Инвестициялар және даму министрі Жеңіс Қасымбек мәлім еткендей,  LRT жобасын іске асыру үшін 2018 – 2019 жылдарға 16,2 млрд. теңге қарастырылған (2018 жылы 9,1 млрд. теңге, 2019 жылы – 7,1 млрд. теңге).

«Қытайлық компаниялар консорциумының қатысушысы – «China Railway No.2 Engineering Group Co., Ltd» компаниясы құрылыс-монтаждау жұмыстарына лицензия (1-санат) алды және тіреуіш іргетастарды, эстакадаларды орнату жұмыстары жүргізілуде. Барлық желі бойынша құрылыс объектілеріне 121 ауыр техника мен 2 262 жұмысшы жұмылдырылды. 2018 жылдың 16 маусымындағы жағдай бойынша 80,5% ұңғымаларды бұрғылау тіреуіштері, 35% ростверк, 16,8% тіректер мен бағандар, 10,1% құрама біліктер орнатылды, депо объектілерінде 2 618 тіреуіштер қағылды»,-деп атап өтті Жеңіс Қасымбек.

Сондай-ақ, Астана қаласының сыртқы айналма жолдарын тұйықтау мақсатында «Астана қаласының Оңтүстік-Батыс айналма» автомобиль жолын салу жұмыстары жүріп жатыр.

«Автожолдың ұзақтығы – 33 шақырым. Ол 4 жолақтық қозғалысы бар 1-ші санатты жол болып салынады. Жобаға 344 бірлік құрылыс техникасы, 621 жұмысшы жұмылдырылды. Шарт бойынша жолды салу жұмыстары 2017 жылы басталды және жобаны 2019 жылы аяқтау жоспарланып отыр»,-деді министр.  

Бұдан бөлек, Угольная, №14, №12 және Бейсеков (кіші айналма жол) көшелері арқылы өтетін магистралды жолды салу жүзеге асырылуда.

Фото мұрағаттан алынды