Астанада запасқа шығарылған десантшыларды салтанатты түрде қарсы алды

Қонаев гарнизоны 35 десанттық-шабуылдау бригадасының 30-дан астам әскери қызметшісі туған қаласына оралды.

Әскерге шығарып салу және запасқа шығарылғандарды туған жерлерінде күтіп алу – әскери басқару органдарының өкілдерін, ардагерлерді, туған-туыстарын біріктіретін жақсы дәстүр.

Теміржол вокзалының перроны қарбалас сәт, әскери оркестр ойнап тұр, тіпті ауа-райының өзі осындай қуанышты атмосфераға әсер етпеді. 

Жиынға қатысушыларға арнап Астана қаласы қорғаныс істері жөніндегі департаментінің өкілі запастағы полковник Ғани Артықов сөз сөйледі.

– Жалпы Қазақстан бойынша осы жылдың көктемінде 17 мыңнан аса әскери қызметші запасқа шығарылды, олардың орнына 20 мыңға жуық Отан алдындағы міндетін орындауға аттанып жатыр. Осы көктемде біздің қалаға әскерден бір мың астаналық оралады. Қызмет барысында олар мотоатқыш, зеңбірекші, планшетші, радиотелефоншы және т.б. әскери есептік мамандықтарды меңгерді. Алынған білім мен дағдылар болашақта оларға кәдеге жарарына сенімдімін, – деді ол.

Тәжік-ауған шекарасындағы ұрыс қимылдарының ардагері запастағы подполковник Марат Тұрабаев десантшыларға арнап сөз сөйлеп, оларды оралуымен құттықтап, азаматтық өмірге тез бейімделуін тіледі.

– Ұлым Әленнің элиталық әскерде қызмет еткенін мақтан тұтамын.  Бір жыл ішінде ол қатты өзгерді, шыңдалды, шынықты, өзіне сенімі артты. Енді әскерде қызмет еткеннен кейін ол білім беру жеңілдіктерін пайдаланады, ҰБТ тапсырусыз жоғары білім ала алады. Бұл болашаққа жасалған жаңа перспективалар мен мүмкіндіктер, – деп бөлісті әскери қызметшінің әкесі Ерлан Зайыров.

Десантшылардың кеудешелері мен көк береттеріне балалар таңырқап, сүйсіне қарады. Олар да бір кезде Отан қорғау мектебінен өтері сөзсіз.