Астанада ШЫҰ Қорғаныс министрлерінің кеңесі жанындағы сараптамалық жұмыс тобының XIX отырысы өтті

Шанхай Ынтымақтастық Ұйымына мүше мемлекеттердің қорғаныс ведомстволары өкілдерінің кездесуі Қазақстан Республикасы Ұлттық қорғаныс университетінің базасында өтті. 

Тараптар ШЫҰ-на мүше мемлекеттердің Қорғаныс министрлері кеңесі жанындағы сараптамалық жұмыс тобының 2023 жылғы 6 желтоқсандағы XVIII отырысының хаттамасын іске асыру барысын талқылады. 

Қазақстан Республикасы Қорғаныс министрлігінің өкілі отырысқа қатысушыларды ШЫҰ-на мүше мемлекеттер Қорғаныс министрлерінің кеңесіне дайындық барысы туралы хабардар етті. Оны ұйымдастыру мен өткізуге арналған әдістемелік ұсынымдар жобасы қарауға ұсынылды. 

Сондай-ақ, отырысқа қатысушылар ШЫҰ-на мүше мемлекеттердің «Бейбітшілік кернейі – 2024» әскери оркестрлер фестиваліне дайындық туралы да ақпараттандырылды.

Іс-шара Қазақстанның ШЫҰ-на төрағалығы шеңберінде және халықаралық ұйымға мүше мемлекеттер Қорғаныс министрліктерінің 2024 жылға арналған ынтымақтастық жоспарына сәйкес ұйымдастырылды.