Әскери полиция қызметіне қатысты нормативтік құқықтық актілерге өзгертулер мен толықтырулар енгізіледі

Әскери полиция бас басқармасымен ҚР Қорғаныс министрінің бұйрығына өзгертулер мен толықтырулар әзірленді.

Атап айтқанда, жаңа редакцияда Қорғаныс министрінің мынадай бұйрықтары баяндалған:

- «Анықтау, тергеу органдарынан және соттан жасырынып жүрген, сондай-ақ Қазақстан Республикасы Қарулы Күштерінің әскери бөлімдері орналасқан жерді өз бетінше тастап кеткен әскери қызметшілерді іздестіруді ұйымдастыру қағидаларын бекіту туралы» 2017 жылғы 23 тамыздағы № 473 бұйрығы. Қағида, әскери қызметшілерді іздестіруді ұйымдастыру кезінде әскери техниканы қолдану құқығымен толықтырылды. Сонымен қатар, Қазақстан Республикасы астанасының аталуы «Астана» қаласынан Нұр-Сұлтан қаласы атауына өзгертілуіне байланысты қағидаға өзгертулер енгізілді.

- «Қазақстан Республикасы Қарулы Күштерінің әскери бөлімдері мен әскери полиция органдары қолбасшылығының қару мен оқ-дәріні ұрлау, жоғалту не әскери бөлімнің орналасқан жерін әскери қызметшілердің қарумен бірге өз бетімен тастап кетуі туралы ақпаратқа ден қою қағидаларын бекіту туралы» 2017 жылғы 12 маусымдағы №351 бұйрығы. Өзгерістер жоғарыда көрсетілген бұйрықтың 12 және 15-тармақтарында әскери техника туралы терминологияға қатысты, ол жаңа редакцияда 2005 жылғы 7 қаңтардағы «Қазақстан Республикасының қорғанысы және Қарулы Күштері туралы» ҚР Заңының талаптарына сәйкес келтірілген.

Бұйрық жобаларының толық мәтінімен ашық нормативтік құқықтық актілердің интернет-порталында танысуға болады: https://legalacts.egov.kz.