Десантшылар жоғары сынып оқушылармен қызметтің қыр-сырын бөлісті
Іс-шараға қаланың барлық аудандарынан үш жүзден астам жоғары сынып оқушылары, алғашқы әскери дайындық пәнінің оқытушылары мен жергілікті әскери басқару органдарының өкілдері қатысты.
Алматы қаласындағы Десанттық-шабуылдау әскерлерінің құрамасымен танысу казармадан басталды. Жасөспірімдерге мерзімді қызметтегі сарбаздардың тұрмысы көрсетілді. Олар мектеп оқушыларымен төсек жинау, аяқ киімді тазалау және киімді ұқыпты бүктеу сияқты әскердегі лайфхактарымен бөлісті.
– Әскери-патриоттық тәрбие ол – мемлекеттік саясаттың маңызды құрамдас бөлігі болып табылады. Оқушылар әскердегі қызмет туралы көп біле бермейді. Біз оларға сарбаздардың қалай өмір сүріп жатқанын, қызметін көруге, сондай-ақ мұнда қандай әскери-есептік мамандықтарын алуға болатыны туралы білуге мүмкіндік береміз. Десанттық-шабуылдау әскерлеріндегі қызмет жас жігіттің әлеуетін ашады. Ол өзіне деген сенімділікті арттыруға, нағыз адал достар табуға, жалпы айтқанда Отанның нағыз қорғаушысы болуға мүмкіндік береді, – деді әскери бөлім командирінің тәрбие және идеологиялық жұмыстар жөніндегі орынбасары подполковник Бақытжан Қырғызалиев.
Әскери қызметшілер қаланың жалпы білім беретін мектептерінің оқушыларына әуе-десанттық кешеніне экскурсия ұйымдастырды. Онда десантшылардың парашютпен секіруге қалай дайындалатынын көрсетіп, парашютті төсеу бойынша шеберлік сабақтарын өткізді.
Мерзімді қызметтегі әскери қызметшілер қоян-қолтық ұрысының тәсілдерін, кедергілерді еңсеруді және алғашқы медициналық көмек көрсетуді қалай үйреніп жатқандарын көрсетті.
Әскери бөлімнің алаңында жоғары сынып оқушылары қару-жарақтың, әскери техниканың заманауи үлгілерімен және арнайы жасақ бөлімшелерінің киімдерімен танысты. Мергендердің қарулары мен граната атқыштар ұлдардың қызығушылығын тудырды. Нұсқаушылар олар туралы егжей-тегжейлі айтып беріп, тіпті қолымен ұстап көруге мүмкіндік берді.
– Бүгінгі күнге дейін әскер туралы көп біле берген жоқпын, – деді оқушылардың бірі Әділ Нұрпейісов. – Бірақ бүгін мен бәрін өз көзіммен көріп, сарбаздармен сөйлесіп, Десанттық-шабуылдау әскерлеріне қызмет етуге бел будым. Әскерде қызмет еткеннен кейін менде ЖОО-на грантқа түсу мүмкіндік болатынын білдім.
Экскурсия соңында әскери қызметшілер қару-жарақпен өзін-өзі қорғау әдістерін көрсетті. Ол мектеп оқушыларының қызығушылығын оятып, қошеметтеріне бөленді.