Мемлекеттік қызметтің тиімділігі тек кәсіби білім мен қабылданатын шешімдердің сапасына ғана емес, сонымен қатар мемлекеттік қызметшілердің қарым-қатынас мәдениетінің деңгейіне де байланысты. Іскерлік әдеп нормаларын сақтау азаматтардың мемлекеттік органдарға деген сенімін қалыптастырып, мемлекеттік қызметтің беделін нығайтуға және қолайлы жұмыс ортасын құруға ықпал етеді.
Іскерлік әдеп – өзара құрметке, сыпайылыққа және қызметтік бағыныстылықты сақтауға негізделген жалпыға бірдей қабылданған мінез-құлық қағидаларының жиынтығы. Бұл қағидаларды әріптестермен өзара іс-қимыл барысында да, азаматтармен, басқа мемлекеттік органдардың өкілдерімен және ұйымдармен қарым-қатынас кезінде де сақтау қажет.
Сәлемдесу мәдениетінің маңызы ерекше. Себебі ол адамға деген құрметтің алғашқы көрінісі болып табылады және қызметкер мен жалпы мемлекеттік орган туралы алғашқы әсерді қалыптастырады.
Кәсіби мәдениеттің маңызды құрамдас бөліктерінің бірі – мемлекеттік қызметшінің жұмыс орнындағы мінез-құлқы. Сондықтан мемлекеттік қызметшілер мен оларға теңестірілген адамдар ұстамдылық танытып, айналасындағыларға құрметпен қарауы және өздерінің әрбір іс-әрекеті мемлекеттік органның беделіне әсер ететінін әрдайым есте ұстауы тиіс.
Қызметтік әдеп нормаларын қызметтік кеңестерде, ресми кездесулерде және көпшілік іс-шараларда сақтау да ерекше маңызды. Ұқыптылық, әңгімелесушіге мұқият болу, әріптестердің пікірін тыңдай білу, іскерлік қарым-қатынас стилін сақтау және өз ойын сыпайы жеткізу – жоғары кәсіби мәдениеттің негізгі белгілері болып табылады.
Сондай-ақ орынсыз еркіндікке жол бермеуге, дөрекілікке, әдепсіз пікірлер айтуға, жасына немесе жынысына байланысты кемсітушілікке, әріптестер мен азаматтарға құрметсіздік танытуға жол бермеу қажет.
Әрбір мемлекеттік қызметші өзінің күнделікті мінез-құлқы арқылы мемлекеттік қызметтің оң имиджін қалыптастырады. Сондықтан іскерлік әдеп талаптарын сақтау жай ғана формальдылық емес, заңдылық, адамға құрмет, ашықтық және жауапкершілік қағидаттарына негізделген кәсіби қызметтің ажырамас бөлігі болып табылады.
Министрлік пен ведомстволық бағынысты ұйымдардың қызметкерлері қызметтік ортада әріптестер мен келушілерді сыпайы қарсы алып, әріптестеріне аты-жөнімен құрмет білдіре отырып жүгінуі, қызметтік бағыныстылық қағидаларын сақтауы және атқаратын лауазымына қарамастан барлығымен ізгі ниет пен сыйластыққа негізделген қарым-қатынас орнатуы қажет.