Қазақстан халықаралық инвестициялық төрелікті реформалауды талқылауға қатысты

12–16 қазанда Вена қаласында өткізілген Халықаралық сауда құқығы жөніндегі БҰҰ комиссиясының (ХСҚБҰҰК) инвесторлар мен мемлекеттер арасындағы дауларды реттеу жүйесін реформалау жөніндегі III жұмыс тобының 55-сессиясына Қазақстан Республикасының делегациясы қатысты.

Cессияға байқаушы ретінде қатысқан қазақстандық делегация құрамына ҚР Әділет министрлігі мен ҚР Венадағы халықаралық ұйымдар жанындағы Тұрақты өкілдігінің өкілдері, сондай-ақ халықаралық төрелік жөніндегі ұлттық сарапшы кірді.

Сессия аясында халықаралық инвестициялық дауларды шешу тәртібін жетілдіруге бағытталған ережелердің жобалары қаралды. Талқылау дауларды бейбіт жолмен реттеу, төрелік талқылауларды үшінші тараптардың қаржыландыруы, ұлттық құқықтық қорғау құралдарына жүгіну, қатар жүргізілетін талқылаулардың алдын алу, өтемақы мөлшерін айқындау және инвестициялық шарттарды түсіндіру мәселелерін қамтыды.

Қазақстан делегациясы құқықтық айқындықты арттыруға және мемлекеттер мен инвесторлардың мүдделерін теңгерімді ескеруге бағытталған ұсыныстарға назар аударды. Атап айтқанда, Қазақстан тарапы консультациялардың, келіссөздер мен медиацияның маңызын атап өтіп, дауларды бейбіт жолмен реттеуге жәрдемдесетін шаралар іс жүзінде жүзеге асырылатындай болуы және талқылаулардың негізсіз созылуына әкелмеуі тиіс екенін жеткізді.

Қазақстан инвестициялық дауларды реттеу жүйесін реформалау бойынша теңгерімді тәсілдерді әзірлеуге үлес қоса отырып, ХСҚБҰҰК жұмысына алдағы уақытта да сындарлы қатысуға ниетті.