Қазақстан мен Қырғызстан СІМ басшыларының телефон арқылы сөйлесуі

2020 жылғы 13 сәуірде қырғыз тарапының бастамасы бойынша Қазақстан Республикасының Сыртқы істер министрі Мұхтар Тілеуберді Қырғызстан Республикасының Сыртқы істер министрі Чингиз Айдарбековпен телефон арқылы сөйлесті.

Аймақта COVID-19 коронавирустық індеттің таралуына қарсы әрекет ету, сондай-ақ Қазақстан-Қырғызстан шекарасындағы өткізу пункттерінің өткізу қабілетін сақтау бойынша екі елдің қабылдап жатқан шаралары талқыланды.

Алдағы вегетациялық кезең қарсаңында Киров су қоймасынан және Нарын-Сырдария ГЭС каскадынан суды үздіксіз өткізу бөлігінде жоғары деңгейдегі бұрын қол жеткізілген уағдаластықтарды сапалы іске асыру қажеттілігіне ерекше назар аударылды.

Қырғызстанның сыртқы саяси ведомствосының басшысы Қазақстан тарапына 5 мың тонна бидай ұнын жеткізу бойынша гуманитарлық көмек көрсету туралы шешім қабылдағаны үшін шынайы алғысын білдірді.