ҚР мен БАӘ сыртқы саяси ведомстволары басшыларының телефон арқылы сөйлесуі

Қазақстан Республикасының Сыртқы істер министрі Мұхтар Тілеуберді Біріккен Араб Әмірліктерінің Сыртқы істер және халықаралық ынтымақтастық министрі шейх Абдалла бен Заид Әл Нахаянмен телефон арқылы сөйлесті.

Тараптар елдеріндегі COVID-19 коронавирустық инфекцияға қатысты жағдай, сондай-ақ оның таралуымен күресу үшін қолданылып жатқан шаралар туралы ақпаратпен бөлісті.

М.Тілеуберді Қазақстанға гуманитарлық көмек көрсеткені үшін әмірліктер тарапына алғысын білдіріп, бұл қадам елдер арасындағы достық қарым-қатынастардың жарқын үлгісі болып табылатынын атап өтті. 

Сонымен бірге тараптар Қазақстан-Әмірліктер ынтымақтастығының өзекті мәселелерін және екі елдің халықаралық ұйымдар аясындағы өзара іс-қимылын талқылады.

Ү.ж. 6 сәуірде БАӘ Үкіметінің шешімі бойынша Абу Дабиден Нұр-Сұлтанға жалпы салмағы 13 тоннаға жуық медициналық қорғаныс құралдары, атап айтқанда медициналық маска, қолғап, бахила, антисептик және басқа да заттардан құралған гуманитарлық көмек партиясы жеткізілді.