Сыртқы істер министрлігінде Қазақстан Республикасы Тәуелсіздігінің 30-жылдығына арналған «Қазақстан шетелдік БАҚ көзімен» VI халықаралық байқау жеңімпаздары марапатталды

Нұр-Сұлтан, 26 тамыз 2021 жыл – ҚР Сыртқы істер министрлігінде Қазақстан Республикасы Тәуелсіздігінің 30-жылдығына арналған «Қазақстан шетелдік БАҚ көзімен» VI халықаралық байқау жеңімпаздарын марапаттау рәсімі өтті. ҚР СІМ және Қазақстан бас редакторлар клубының ұйымдастырған байқау осымен алтыншы рет өткізіліп отыр және биылғы конкурс Қазақстан Республикасы тәуелсіздігінің 30-жылдығына арналды.  

Байқау аясында қазылар алқасы әлемнің 40-қа жуық елінің 60 журналисінің жұмысын қарастырды. Материалдар Қазақстанға қатысты экономика, саясат, халықаралық қатынастар, тарих, мәдениет, туризм, денсаулық сақтау, спорт, ядролық қарусыздану, жаңартылмалы энергия көздері сияқты кең ауқымды тақырыптарға, сондай-ақ қазақ халқының көрнекті тұлғалары – Абай Құнанбайұлы мен Әбу Насыр әл-Фарабидің мұрасына арналды. Байқауға қатысушылардың материалдары шетелдік газеттерде, журналдарда, интернет-басылымдарда және танымал интернет платформаларында жарияланды.

Қазылар алқасының шешімімен 6 шетелдік журналист жеңімпаз болып танылды. Олар – «Республика», «Литвалық курьер» апталық басылымдардың және «Эхо Литва» газетінің бас редакторы Н.Жуков (Литва), «Finančné Noviny» басылымының бас редакторы В.Бачишин (Словакия), Пәкістанның жаһандық және стратегиялық зерттеулер орталығының аймақтық сарапшысы доктор М.ул-Хасан Хан (Пәкістан), Канаданың эмиграция және мультикультурализм мәселелері жөніндегі бұрынғы министрі Т.Рупрехт (Канада), «BCI Медиа» компаниясының коммерциялық продюсері И.Черней-Келнер (Канада), және «MNB» телеарнасының тілшісі Ц.Бат-Эрдэнэ (Монғолия).

Марапаттау рәсіміне Қазақстан Республикасы Сыртқы істер министрінің орынбасары Ерлан Әлімбаев, Қазақстан бас редакторлары клубының президенті Бибігүл Жексенбай, Нұр-Сұлтан қаласында аккредиттелген шетелдік дипломатиялық корпустың және жетекші қазақстандық БАҚ өкілдері қатысты.

Сыртқы істер министрінің орынбасары Ерлан Әлімбаев жеңімпаздарды құттықтай отырып, байқаудың барлық қатысушыларына алғыс білдірді. Ол конкурсқа қатысушылардың саны жылдан жылға артып келе жатқанын, өтінімдер географиясының кеңейгенін, бұл шетелдік бұқаралық ақпарат құралдары тарапынан Қазақстанға деген қызығушылықтың артқанын көрсететінін атап өтті. Е.Әлімбаев Сыртқы істер министрлігінің коронавирус пандемиясына байланысты шектеулерді сақтай отырып, мазмұнды бағдарлама ұйымдастырғанын, оның аясында байқау жеңімпаздары Қазақстан, оның қазіргі дамуы мен 30 жыл ішінде қол жеткізген жетістіктері туралы толығырақ білуге, халқымыздың қонақжайлылығын сезінуге ​​мүмкіндік алатынын айтты.

Қазақстан бас редакторлары клубының президенті Бибігүл Жексенбай қазақстандық БАҚ-тың елдің дамуындағы рөлі және ол туралы объективті ақпаратты халықаралық аренада ілгерілету, осы мақсатта шетелдік әріптестермен сындарлы ынтымақтастыққа ашық екендігі жөнінде айтып берді.

Іс-шара барысында «Қазақстан шетелдік БАҚ көзімен» байқауының жеңімпаздары дипломдармен марапатталды.

Өз кезегінде, шетелдік журналистер байқауды ұйымдастырушыларға алғыс айтып, Қазақстаннан алған әсерлерімен бөлісті.

Сонымен қатар, шетелдік дипломатиялық корпустың өкілдері байқауды ұйымдастырушыларға ризашылықтарын білдіріп, осындай шаралардың олардың азаматтарының Қазақстанмен жақын танысуына және мәдениеттер мен халықтардың жақындасуына ықпал ететінін атап өтті.

Байқау жеңімпаздары Қазақстанға саяхат турына қатысуға, оның ішінде Нұр-Сұлтан, Түркістан және Алматы қалаларына, сондай-ақ Бурабай демалыс аймағына баруға мүмкіндік алды.